ZALEN September 29, 2025: Mizoramah dam chhunga jail tang tur (lifer) mi 63 an awm mek a, September 24, 2025 thleng khan Mizorama jail hrang hrang 10-ah mi tang (prisoner) 1,933 an awm a, awm thei zat (jail capacity) aia mi tang tamna 685 a tling a. Hetihlai hian central jail leh jail dang pathumah mi tang an khat vek.

Prison department tar lan danin Mizoramah jail 10 awmin chung chu mi 1,496 awm theihna a nih laiin tang awm mek zat chu 1,933 an tling a. Central Jail, Aizawl chu an tamna ber a ni.

Jail lian ber, Central Jail hi mi 480 awm theihna a nih laiin September 24, 2025 thlenga tang zat chu mi 931 an ni a, tang awm thei zat an pelhna chu 451 a ni.

Mi tang 96 awm theihna, Central Women Jail, Aizawlah tang 149 an awm mek a. District Jail, Aizawlah tang 138 awmin 90 awm theihna a ni a. Mi tang 109 awm theihna, District Jail, Lungleiah tang 146 an awm mek a. Central Jail bakah heng jail pathumah hian a awm thei zat aia tam an awm.

District Jail, Siaha-ah tang 65 awmin he jail hi tang 92 awm theihna a ni a. Tang 105 awm theihna, District jail, Champhaiah 201 awm mek bawkin mi tang awm thei zat aia tam tang an awm a. District Jail, Kolasib-ah tang 134 awm theihnaah 103 an awm mek.

District Jail, Lawngtlai-ah tang 26 awm mekin mi 98 awm theihna a ni a. District Jail, Serchhipa mi tang 128 awm theihnaah tang 86 an awm a, mi tang 96 awm theihna District Jail, Mamitah 88 an awm mek bawk.

Prision department tar lan danin tun dinhmunah dam chhung tang tura hrem tawk mi 63 an awmm mek a, chung mite chu Central Jail, Aizawlah mi 55 tangin, District Jail, Aizawl-ah mi psarih leh District Jail, Lawngtlai-ah mi pakhat tang an awm mek.