ZALEN October 10, 2025: Dampa bial By election inthlan neih tura Dampa bial chhung khaw hrang hranga fang kual mek John Rotluangliana, Vice President MPCC leh Congress Candidate chuan Saithah, Phuldungsei, Parvatui leh Lallen te tlawhin Congress Party zawm thar mi 40 a lawmlut a, tun tum bye-election leh 2028 inthlanpuia an Party star campaigner tur chu Lalduhoma leh Zoramthanga te an ni a ti. 

John Rotluangliana chuan, "ZPM Candidate Vanlalsailova hi Congress tan a hnawk miah lo. A tan hian ZPM party hi hling an ni. Chutiangin MNF party pawh tun hnaiah Pu Zoramthanga a hlim thar lutuk chuan headquarters leh Dampa biala an Candidate Dr. R. Lalthangliana leh an party nasa takin a ti hnual a. ZPM leh MNF party leader Pu Lalduhoma leh Pu Zoramthanga hi By election leh kum 2028 MLA inthlanpui atana Congress Party Star Campaigner an ni. Anni pahnih hi an dam that kan duhsak takzet a ni. Tluang taka Zoram pum tlawha an zin theih phawt chuan chiang takin kum 2028-ah Congress kan sawrkar ang," a ti. 

"Congress a sawrkar apiangin Ram rohlu kan neih belh a, Mizoramin a neih Mizoram rohlu hi Congress party hmalakna vek a ni a, ZPM leh MNF hmalakna Mizoram kan hmuh chu thlalak chauh a ni. Congress a sawrkar chuan ram a ralmuang a, thlarau hlimna a thleng thin. MNF, ZPM leh Party dang an sawrkar apiangin Mizoramin manganna kan tawk a, Kohhran thlarau nun a chau a, Ram rohlu siamna tur nasa takin suamsam a ni thin. Chuvangin kan ramah hian tute nge rintlak, an sawrkar laia an thutiam hlenchhuak tute nge? An sawrkar laia an thutiam tute nge bawhchhetu tih atangin Dampa bial leh Mizoram mipuiin tehna hmang turin ka ngen a ni," a ti. 

John Rotluangliana chuan, "Sumo seat in ken pawh harsa kan tih laiin Congress Party chuan Mizoram mipui duhthusam remna leh muanna atan Chief Minister thutthleng kan kian thei. MNF leh ZPM chuan engkim an in chuh a, Dampa bial By election neih turah an headquarters atangin an Candidate duh leh duh lo an awm ve ve avangin seng khawm hna Congress party in kan thawk a ni, Dampa bial atang hian Congress in Mizoram hmasawnna hna thawh bul kan tan leh tawh dawn a ni," a ti bawk.