ZALEN August 24, 2025: Mizoramah nikum chhung khan doctor-ten mitthite thihna chhan an chhinchhiah mi 4,329 awmin heng zingah hian mipa tam zawkin 2,843 leh hmeichhia 1,486 an awm a. Thihna thlentu zingah kawchhung lam tha lo an tam ber.

Economics & Statistics Department-in kum tina sawrkar damdawi in, mi mal enkawl damdawi in, UPHC, CHC, PHC leh hmun thenkhata Registrar of Births & Deaths hrang hrang 116-te hnen atanga damlote thih dan, ‘Medical Certification of Cause of Death 2024’ a tihchhuah atanga a lan danin nikum chhung khan heng damdawi in leh RBD-te chhinchhiah hmunahte hian mitthi 4,329 an awm.

Thudawn danin MCCD-a thi chhinchhiah hi Mizorama thi zawng zawng zatve vel niin hmeichhia aia mipa thi an tam zawkna hi 1,357 a ni a, MCCD atanga chhutin hmeichhia aia mipa thi tam zawkna hi 65.67% a ni.

Medical Certification of Cause of Death 2024 tarlan danin pum lam tha lo vanga thi 803 zinga 607 hi mipa niin a dang 197 hi hmeichhia an ni a. Pum lam tha lo zingah hian thin (liver) tha lo vanga thi an tam lawr lak a, digestive system tha lo vanga thi 18.5% zinga 15% hi thin leh a kaihhnawih tha lo an ni. Thin tha lo zingah zu in, hepatitis, toxic leh thin ro (cirrhosis) te chu a langsar an ni.

Thihna thlentu pahnihna thawk lama harsatna (respiratory system) vanga thi zinga 428 hi mipa niin hmeichhia 238 an awm a, pathumna thisen zam tha lo (circulatory system) vanga thi zingah pawh mipa tam zawkin 414 an awm a, hmeichhia 222 an awm bawk.

Nikuma MCCD a thi chhinchhiah atanga a lan danin District hrang hrang zingah Aizawl District-ah mitthi an tam ber a, mi 2609 an thi nia chhinchhiah a ni. District hrang hranga MCCD thi chhinchhiah hi Mamit district ah 202, Kolasib 336, Champhai 1962, Serchhip 81, Lunglei 418, Lawngtlai 209, Siaha 217, Khawzawl 47, Hnahthial 60 leh Saitual district ah 87 te an ni. 

ZALEN zawhna chhangin Economics & Statistics Department thawktute chuan data an lakkhawm hi World Health Organisation (WHO) in ruahmanna a siam anga mithiam ten an thihchhan an ziah niin an sawi a. Mizorama mitthi zawng zawng an thihchhan an chhinchhiah vek thei lo tih sawiin damdawi ina inenkawl leh thi te chauh MCCD ah hian an thih chhan tarlan a ni tih an sawi.

Kum 6 chhunga MCCD vanga thi zat

Kum   Mipa    Hmeichhia   Total

2019   2125   1317    3442

2020   2180   1138    3318

2021   2415   1320    3735

2022   2656   1408    4064

2023   2607   1323    3930

2024   2843   1486    4329