ZALEN September 3, 2025: Dampa bial By-election MNF Official Candidate atana MNF Sr.Vice President Dr.R.Lalthangliana puan a nih hnu thu a sawinaah MNF President Zoramthanga chuan an Senior Vice President Dr. Thangtea hi a din a tulin an hria a. Inthlan result chhuah hma leh inthlan hma hauh pawhin Dampa bial mipui hi an vannei hle a ni, a ti.

Zoramthanga chuan opposition nih laia by-election a din hi a hautak khawp mai a, kum hnih pawh la sawrkar lo candidate khing tura kal hi phurawm loh tak a nih bakah, MNF MLA Lalrintluanga Sailo bial ruaka ding tur ruat a ngai ta mai hi a lungchhiatthlak tel bawk a. Rintluanga'n Dampa bial hmasawnna hna a lo thawh mek leh hmachhawpte chhunzawm turin Senior Vice President Dr. Thangtea hi a din a tulin a hria a. Inthlan result chhuah hma leh inthlan hma hauh pawhin Dampa bial mipui hi an vannei hle a ni, a ti.

MNF President chuan, "Kan rulling party-te hi candidate an puang hma hle mai a, House-in sunna an neih pawh an nghak hman lo kha a mak hle a ni. Dampa bial ZPM thlipui tleh tak tak laia kan tlinna bial a ni a, tunah a hma ang khan an thlipui a tleh tawh si lo a, kan party hotupa Thangtea hi Pathian leh Dampa bial mipui zarah a tlin ngei ka beisei tlat a ni," a ti bawk.

MNF official candidate Dr. R. Lalthangliana chuan, "Pu Rintluanga Sailo khan kum 1986-a ramhnuai atanga an lo chhuah khan u ang chiahin min vuan nghet nghal chat a, kei pawhin nau ang chiahin ka en a ni," a ti. 

Dampa bial-a ding tur hian tawngtai reng thin mite a rawn thu Dr. R. Lalthangliana chuan sawiin, "Heng mite hi chung lam rawnin an tawngtai reng a, ka tlin dawn leh dawn loh chu an sawilo na chungin; ding rawh min ti vek a. Politics-ah hian ka danglam bikna em em chu kan hotute thu ka hnial ngai lo, Nationalism nunpuitute min sawmna hi hnar thei niin ka inhre lo a, engmah chhuan tur ka neilo a, kan mittui tla mek min hruk hulsak turin Dampa bial mipui ka sawm tak zet a ni," a ti.

Dr. R. Lalthangliana chuan, "Nidanga inthlan tur nen a inanglo hle a, kum 1987 atang khan MLA-ah tum 10 ka lo ding ve tawh a, tun tumah erawh mittui nen thusawi a lo ngai ta a, mumangte pawh a ang rum rumin ka hria. MNF leh MNF ni lemlote hnenah ka sawi duh chu Pu Rintluanga sulhnu la zawh fel si loh te, chhunzawmin Bangladesh nen border trade lama kan hmalak tawhnate hi chhunzawm tur kan ngah hle a, chumi ti thei tur chuan Dampa bial mipui khawngaih vote ka ngen a ni," a ti bawk.

Lalrintluanga Sailo MLA (L) nupui Lalbiakthuami pawhin, "Kan pa leh Pu Thangtea hi unau ang chiah an ni a, Pu Thangtea hian a hmangaih em em a, kan pa pawh khan a hmangaih em em bawk. Kan pa hian Dampa bial hi bial himah siamin kan enkawl reng ang tiin, a rilru zawng zawng khan a hmangaih em em thin a. Pu Thangtea hi tling ngei turin keini chhungkua chuan duhsakna kan hlan a, theihtawp kan chhuah dawn a ni," a ti.