Commissioner of State Tax chuan thuchhuah a siam a, bungraw tam takah Central lam atangin Goods and Services Tax (GST) tihniam anih avangin GST tihniamna bungruate chu a zawrh chhuahna man India ram pumah a tlahniam dawn a. Hei hi September ni 22 atanga hman tan tura tih a ni a, Mizoram-ah pawh GST hniamna bungruate chu man hniama zuar turin a hriat­tir a.

A tlangpuiin chhiah hniamna bungruate hi 7%-10% te a ni tlangpui a, lang thamin bungraw man a hniam dawn tihna a ni.

Taxation Commissioner chuan GST tihhniamna bungrua a man to a hralh luite chu dan anga hrem theih an nih thu thuchhuah a siamah a tarlang a. Hetiang tihching sumdawngte chu report turin mipui lam a chah bawk a ni.

Chhiah pek hi kan hnam hian kan tih turah kan ngai hlei thei lo ti ila a sual thui vak lo ang. Sumdawng zingah tam tak chu tunah hian GST a chhiah chhung duh lo leh pek tum lem lo an la tam tih a hriat a. Heng mite hi thur chhuakin chhiah pe tura tihluih an hun tawh hle a ni.

Mipuite thil leiah hian GST pek vek a ni tawh zawk a. Sumdawng liante'n bungrua emaw service emaw an hralhah chhiah a bet tlangpui tawh zawk a. Chumi sum chu chhiah angin mipui sawrkar chanpual a ni tawh a, sawrkar bawma chhungtu turte chu sumdawngte an ni ve thung tawh a, an mawh a ni bawk a ni. Sumdawngte'n GST an laknaa chhiah an pek that duh loh hian mipui sawrkar chanpual an eiru tihna a ni.

Chhiah chungchang a bikin GST hian rel leh sawi a hlawh nasa tawh a, politic inchirh thehna rawng kai lek lek hmuh turte pawh a awm leh thin a ni. Kan sawi fo angin thawhchhuah nei mang lo ram kan nih angin kan chhun luh ve theih chu chhiah hi a ni a, hemi lamah hian nasa taka tan lak thar a tul tawh tih a lang mek a ni. Phungthluk a hun tawh lo e.

Eng pawh ni se, GST rate danglam tur huhang hmang hian Taxation Department lam hian tan han la thar sela, a tak ram thlirin kan inhnuh deuh hrawih a hun tawh e.