ZALEN August 15, 2025 : Congress chuan Aizawl District Congress Committe huaihawtin August ni 14, 2025 zan dar 8 khan India rama Electoral Roll tihchingpen duhlohna lantir nan 'Massive Candle lights protest' Vanapa Hall kawtah an nei a, MPCC Sr Vice President Lalnunmawia Chuango chuan, , MPCC chuan thu a sawi a ni.

Lalnunmawia Chuaungo chuan, "India ram hmun hrang hranga Electoral Roll tihchingpena a awm hi BJP leh a thawhpuiten chakna an chan theihna tura an hmalakna a ni satliah lova, India ramin domocracy kan neih tihbawrhbanna a ni. Hetiang anga a kal zel a, India rama election dik leh felfai taka a kal theihna tura a enkawltu a ruat, sawrkar hnuaia awm lo, Constitutional Body Election in a tihtur a ti thei lo a nih chuan Democracy kal zel dan tur hi ngaihtuahawm tak a ni. 

"Tun anga kan kal chho zel a nih chuan hun reiloteah India democracy hi tihchimiha awmin, China, Russia ram anga a hminga inthlan awm ve si, sorkarna fawng chelhtute chauh thlantlin an nih theihna ram te ang dinhmunah kan ding thei a ni.

"India ram hian Constitution felfai leh tha tak kan nei a, hemi kan neih theih nana sulsutu chu Congress party a ni. India ramin inthlanna felfai tak kan neih theihna tura dan chipchiar leh tha tak, vote thlak dan tur leh vote nei thei tur te fel taka lo siamtu pawh Congress party kan ni. Heng hi tihbawrhbanin a awm mek a ni. 

"Lok Sabha inthlan 2024 khan thil fello tamtak a awm a ni tih Congress party chuan a hria a. Mahse finfiahna a awm mai loh avangin zirchianna hun engemaw chen neih a ni a. Hmani lawk khan Rahul Gandhi chuan a rawn puangchhuak ta a ni. Thil diklo tamtak awm karah Banglore khawpui chhunga Assembly bial khat chuah ah pawh vote nuaih khat chuang tihchingpen in a awm a ni. Heng te vang hian BJP in India ramah rorelna an chang nawn thei a ni. 

"Bihar ah Election a awm dawn a, chumi a Vote an ennawnna ah draft roll an tichhuak a, voter ni thin nuaih 65 chuang electoral roll atangin a chhan mumal pawh tarlang lovin an paih daih mai a. Politician leh pawl hrang hrangin Supreme Court ah case an file a, Supreme court chuan interim order tichhukin electoral roll atanga a paih te a paih chhan puangchhuak turin a ti a ni. Tunah hian BJP leh Election Commission of India te hi an buai chho mek a ni. 

"Zaninah hian helaia kan rawn punkhawm chhan hi Congress tan, congress party hamthat nan a ni lova, India ram democracy humhimna atan a ni tih zaninah hian kan puang duh a. Congress party hi kan phur a, kan tho chhuak mek a tih zaninah hian Mizoram mipuite pawhin an hmu thei ang tih kan ring a ni." a ti.