ZALEN July 24, 2025 : Excise & Narcotics Department leh Assam Rifles thawkho chuan July 23, 2025 (Nilaini) zan dar 7:30 khan Zote – Bulfek kawng pui, Champhai District-ah Methamphetamine Kg 1 & gram 110 (Tablet 10,100) leh a neitu nia puh –Lalfakawma (27) s/o Biakzauva (L), Dampui, Myanmar, tuna Champhai Kanan venga khawsa mek nia inchhal chu an man.

Excise & Narcotics Department leh Assam Rifles thawkdun chuan vawiin July 24, 2025 (Ningani) zing dar 3:10 khan Tuikhuahtlang, Aizawl-ah Methamphetamine Kg 1 & gram 972 (Tablet 20,000) leh a neitu nia puh mi pathum – Taj Uddin (22) s/o Azizur Rahman, Jurbari, Patharkandi PS, Karimganj, Assam; Mahub Hussain (21) s/o Abdul Salam, Purachandpur, Patharkandi PS, Karimganj, Assam leh Halal Uddin (21) s/o Babul Miah, Dharmanagar, Tripura-a khawsa nia inchhalte chu an man. Methamphetamine phurhna atana an hman car, Wagon R, Regn No. MZ01 V-3492 pawh hrensak nghal an ni.

Methamphetamine vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, July ni 24, 2025 khan Court-ah hruai nghal an ni.

Excise & Narcotics department hian tun hnaiah dan bawhchiaa zu siamtute zu siamna hmun dapin zu bilh lai leh zu siam sa an tichhe nasa hle. Kumin, 2025 chhung hian Rakzu liter 41,222 man tawh a ni a, zu bilh lai Tin 79,444 zet tihchhiat a ni tawh bawk.