ZALEN August 10, 2025: Mizoramin phai lam atanga ei tur a chawkluhna kawngpui ber national highway, Silchar kawng hun eng emaw chen lirthei tan kal a harsat avang leh bungraw phur lirtheite an tlan hleih theih loh avangin nitin mamawh thenkhat a vâng a. Kawng hi hawn tawh niin thil vâng pawh a ziaawm thuai beisei a ni.

ZALEN zawhna chhangin Mizorama sumdawng intelkhawm pawl, Mizoram Merchant Association (MIMA) President PC Laldinthara chuan kawng chhia chu sumdawngten nasa takin an tuar tih a sawi a. “Bungraw phurh man truck kan hire-na thin pawh a hma aiin Rs. 35,000 velin a to belh a, Haflong kawng chhia vangin Shillong lama kualtirnaah inpek chhawn a ngaih vangin Rs. 40,000 atanga Rs. 50,000 kan chawi belh a. Bungraw phur lirtheite hi Bualpui atanga an lo chhoh zel ngam loh vangin anmahni hruaina, mutia rawihna leh thil dang neuh neuh nen nuai khat chuang chu kan chawi belh dawn tihna a ni,” a ti.

“Dawr luah man, hnathawk hlawh, loan leh thil dang kan pek ngei ngei a ngai a. Lirthei hman man a to bawk nen, hlep kan nei thei pawhin a rinawm loh a. Kawng chhia vang hian dawrkaiten thla hmasa July khan ni danga kan inhralh (turnover) chanve vel chauh kan hmu a. Tun thlaah kawng chhia bakah lirthei kal phal a nih loh bawk avangin sawrkara chhiah kan chawi, GST pawh nasa takin a kiam phah dawn a ni,” a ti bawk.

MIMA president chuan phai atanga an thil chahte pawh kawng chhia vang hian a lo thleng thei lo niin a sawi bawk.

Hetih lai hian dawrkai pakhat chuan bungrua a thlen that loh avangin an thil zawrh thin bungraw thenkhat chu hralh tur an nei mumal tawh lo niin a sawi a. “Mipui mamawh bawnghnute, maggi, tel, chini leh thil dang eng emaw zat chu lak tur pawh a awm mumal tawh lo a. Heng bungruate hi chah mah ila lirthei a kal mumal theih loh avangin phai atangin an rawn thawn thei lo a, a buaithlak khawp mai,” tiin ZALEN a hrilh.

Hardware dawr neitu pakhat pawhin harsatna an tawk tih sawi bawkin, “Kawng chhia hian min nghawng hneh hle mai a, a bik takin cement leh iron rod lam phei chu capital intensive lutuk a nih bakah retail business-ah chuan profit margin tlemna pawl a nih angin kan tuar hle a. Cement pawh Bualpui vel atangin lirthei tê zawk hmangin kan phurh leh a ngai a, lirthei hire-na sensoah kan hmang nasa hle a ni,” a ti.

In sa mek pakhat pawhin duh anga cement lei tur an hmuh loh vangin an hnathawhin a tawrh phah tih a sawi bawk.

Aizawla two wheeler khalhtu pakhat chuan duh anga petrol lei tur an hmuh loh vangin harsatna an tawk tih a sawi bawk a. “Petrol pump free sale-na kan hmuh fuh changin kan la a ni mai a, a bak chu a to-a lei a ngai a. Petrol man hi to mah se kan rate aia sangin kan tlan thei si lo a; chuvangin, ni dang angin kan hlawh tha thei lo a ni,” a ti.

Delivery boy pakhat pawhin kawng chhia chu an tuar tih ZALEN hrilhin, “Thil chah tam tak chu kawng chhiat vang hian a thawntuten an rawn cancel a, ni dang ai chuan sem tur pawh kan nei tlemin kan hlawh pawhin ni dang a pha lo,” tiin a sawi ve bawk.