ZALEN Aizawl 4, 2025: Nimina MNF National Core Committee leh Political Affairs Committee te, MNF Legislature Party te chuan Mizo Hnam Run ah Joint meeting an nei a. Forest Conservation (Amendment) Act, 2023 adopt-na Resolution chu sut tura Mizoram Legislative Assembly Special Session koh rawtna Mizoram Sawrkar hnenah thlen nise tiin,thurel hi bawhzui nghalin Assembly Speaker hnenah ni 3. 9. 2025 tlai khan a hnuai ami ang hian thehluh nghal a ni.

1. Tun Assembly session (27 & 28,Aug 2025) a Forest Conservation (Amendment) Act 2023 adopt-na Resolution kha India danpui Article 371 G hmanga MNF Sawrkar laia lungrual taka thutlukna lo siam tawh thiahna tur anih avang leh ram leh hnam tana pawi tak anih avangin Mizoram Assembly Secretariat atanga Lok Sabha a, a Resolution chungchang hriattirna leh Resolution copy pawh thawn rihloh nise.

2. He Forest Conservation (Amendment) Act, 2023 hi kan ram leh hnam tana thil thalo leh kan ram Central sorkar kuta Dan hmanga hlanna anih theih tlat avangin Assembly Special Session rang taka koh a, Forest Conservation (Amendment) Act, 2023 adopt-na Resolution kha sut leh ngei kan phut a. Chumi tur chuan rang taka Special Session ko a hma la turin, tiin.

MNF chuan tunhnaia Mizoram Assembly Session in Forest Conservation (Amendment) Act, 2023 hnawlna (duhloh na) MNF Sawrkarin a lo siam tawh thiah a ni hi pawi a ti takzet a. Ram leh Hnam himna ti derthawng thei a nih avangin ngaihtuahna sen nawn leh ngeina turah a ngai a ni.

1) Forest Conservation Act, 1980 tihdanglam tumna a awm tirh atangin MNF Party chuan ngun takin ngaihtuahna a hmang tawha, NGOs liante, Environment Based NGO’s te, Kohhran aiawh te bakah Political party hrang hrang aiawh zawng zawng te nen pawh inrawn khawmna te neiin Forest Conservation (Amendment) Bill 2023 duhlohna chu, Parliament a pass a nih loh nan MNF Sawrkar chuan hma lain Central Sawrkar-ah pawh a duhlohna vawi duailo a lo thlen tawh a ni.

2) MNF Party leh MNF Sawrkar chuan India danpui hnuaia in humhimna dan Article 371G kan neih hi MNF leh India Sawrkar inremna rah chhuah liau liau a nih avang leh Hnam hnuk khawih a nih avangin, a bawhchhe zawnga chet lak hi kan do tlat a. MNF Sawrkar laia Article 371G hmanga Forest Conservation (Amendment) Act, 2023 duhlohna Resolution Mizoram Assembly-in alo pass tawh thiah nan a ZPM Sawrkar-in Official Resolution put luh dan kalphung pawh zawm mumal lova, Assembly Session-a a pu lut leh a Adopt ta mai hi kan dem takzet a ni.

3) Kan duhlo chunga Forest Conservation (Amendment) Bill, 2023 Parliament in a passed pawh khan khatih laia MNF Sorkar khan Forest Conservation (Amendment) Act, 2023 chu pawm thei lovin Council of Minister in Duhlohna Resolution siam rawtna chu alo pawm daih tawh.

4) Forest (Conservation) Amendment Act 2023 Parliament in a passed hnua Mizoram Assembly Session hmasaber ah ni 22.8.2023 khan MNF sorkar chuan Forest Conservation (Amendment) Act, 2023 hnawlna leh duhlohna chu alo passed tawh a. Dan angin Mizoram Assembly Secretariat atangin Lok Sabha Secretary General pawh official a hriattir nghal niin Resolution copy pawh thawn a ni bawk.

5) Tunhnai ni 27.8.2025 a Assembly session a sawiho anih khan MNF MLA 2 viz Pu Lalchhandama Ralte MLA & LoP leh Pu Robert Romawia Royte MLA te chuan ZPM Forest Minister in Forest Conservation (Amendment) Act, 2023 adopt-na tur Resolution a rawn ‘move’ hnu khan ‘adopt na Resolution chu pass an duhloh thu an sawi chhuak a nih kha.

Chief Minister zahawm tak Pu Lalduhoma erawh chuan thudiklo House hrilhin MNF Sorkarin Assembly Resolution umzui lo leh Central sorkarah pawh Resolution chu thlen lovah dawtin a puh kha a pawi kan tiin, Chief Minister meuhin Assembly House a thudiklo chiang tak a sawi khan Assembly zahawmna nasa takin a tihniam ah kan ngai a ni.

6) MNF Party chu he Forest Conservation (Amendment) Act, 2023 chungchangah hian kan dinna ngaiah nghet takin kan la ding tlat a. He dan Amendment hmanga Mizo mipuite leh Mizoram sorkar ngei thuneihna chhuhsakna section/provisions dahbelhte hi ram leh hnam tan himlo a ti takzet a ni.