ZALEN, September 10, 2025: Ruihhlo do beihpui thlakna chi khat atana Mizoram sorkarin Public Private Poperty (PPP) Mode-a Hulhhliap Short Stay Centre (SSC) a kalpui mekah a chhuak tawh mi 11-in food processing skill training an zo tawh.

Hulhliap SSC hi sorkar, YMA, MHIP leh Mizoram Synod tanghovn an buatsaih niin tunah hian Synod Camping Centre, Neihbawiah a batch thumna kalpui mek a ni a, ruihhlo ngai mi 208 an lut.

Thawh khatna leh thawh hniha chhuak, sorkara Referral Task Group-in thla thum chhung thlithlaia ruihhlo laka fihlim zuite tan skill training a kalpuiah food processing zir chhuak mi 11 an awm tawh bakah electrical technician mi 28 leh alluminium fabrication mi 18-in an zir mek bawk.

Training hi sorkar laipuia National Skills Qualification Framework (NSQF) duan anga pek an ni a. An chhuah hunah Mizoram Council for Vocational Training hminga certificate pek vek an ni ang.

Hulhhliah SSC hi batch khatah mi 150 zel enkawl theihna ni mah se diltu an tam avangin batch hmasa berah mi 256 leh batch hnihnaah mi 544 an lut a. Batch khat hi ni 20 zel niin a tir lam ni 10 chhung detoxification kalpui a ni a, a dawt ni nga chu rilru enkawlna (psychological counseling) hun atan hmangin a bak ni nga chu Synod Revival Department bultumin gospel camping neih thin a ni.

Batch hmasa ber leh a dawttua lutte chhui zuinaah 74% chu ruihhlo lakah an fihlim zui zel a ni.

Sorkar chuan Hulhhliap SSC kalpui nan Rs. nuai 108 a pe a. Batch lina chu September thlaa neih leh tum niin a tul anga kalpui zel tum a ni.