ZALEN July 26, 2026: Kum 2022 atanga June, 2026 inkar chhung khan Mizoram jail hrang hrang atangin tang tlan chhuak mi 73 an awm a, heng zinga 39-te chu man leh an ni.

RTI zawhna, SPIO Prisons department-in a chhanna atanga a lan danin tang tlan chhuak hi Central Jail, Aizawl-ah tam berin mi 26 an tlan chhuak a. Hmun dang jail atanga an tlan chhuahnate hi district jail, Siaha atangin paruk, Aizawl atangin pathum, Champhai atangin 11, Lunglei atangin pakua, Serchhip atangin panga, Kolasib atangin pali, Lawngtlai atangin pahnih, Mamit district jail atangin pahnih leh Central Women Jail, Aizawl atangin pali te an ni.

Tangte an tlan chhuah chhan hrang hrang zinga a langsar zual chu vengtu indaih loh vang te, jail hmun hma hlui tawh lutuk leh thawm that ngaih vang te (tunah hian jail thenkhat thawm that mek an ni), jail tang hospital leh court-a kalte police custody a awm laia tlanchhuah vang te an ni tih a sawi.

Tun dinhmunah Mizoram chhungah jail 10 - Central Jail, Aizawl, Central Women Jail, Aizawl bakah Aizawl, Lunglei, Siaha, Champhai, Kolasib, Lawngtlai, Serchhip leh Mamit-a district jail te an ni.

Mizoram jail-ah hian tang 1,458 awm thei tura ruahman anih laiin he thu buatsaih lai hian tang 1,880 an awm mek a, tang awm thei tur zat hisap aia tang an awm tamna hi 422 a ni a. Mizoram chhunga jail zingah Central Jail, Aizawl, Central Women Jail, District Jail Lunglei leh Champhai-ah te tang awm thei tur zat bithliah aia tam an awm mek a ni.