ZALEN July 26, 2026: Excise & Narcotics department-in hriselna kaihhnawiha zu kawl leh in phalna, ‘red card’ nei turin mi 100 velin form an la chhuak tawh a, hetih lai hian mi pahnih chauhin an la thehlut thung.

Excise & Narcotics thawktute hnen atanga ZALEN thudawn danin tuna red card dilna an hawn hi tum dang anga wine permit ang kha a ni lo a. Permit dil turte chuan hriselna kaihhnawihah an dil thei ang tih a ni a, dilna hi doctor-in hriselna kaihhnawih atan a mamawh tih a ziah mai bakah an awmna District Medical Superintendent-in a hriatpui (counter sing) a ngai leh a. Chuvangin, dil pawh an tam lo nia an hriat thu an sawi.

Red card hi Mizorama zu khapna dan tlawhchhanin hriselna kaihhnawiha zu kawl leh in mamawhte tana siam a ni a. Red card chu a dilna tur form siamsa Rs. 50 man hmanga dil tur a niin kum khat a nung ang a, kum khat atan red card fee Rs. 5000 chawi a ngai bawk. Excise & Narcotics department chuan Commissioner office-ah a mamawhten zu an lak theihna tur departmental store siam an tum.