ZALEN Aizawl 9, 2025 : Mizoram Legislative Aseembly Session Dt 27.8.2025 a Forest Conservation Amendment Act adopt-na Resolution Forest Minister Lalthansanga'n a put luh pass a ni kha Congress party chuan ram leh hnam tana pawi thei a nih avangin pawi an ti a. Pawl hrang hrang intelkhawm, Joint Civil Society of Mizoram (JCM) in Special Session koha sut leh tura an nawrna leh Kawngzawh huaihawt an tum pawh an thlawp tlat an ti. 

Congress chuan Forest Conservation Amendment Act hi mithiam leh hre ril zawk ten a ngial a ngana hman an duh lova, tu leh fa, chhuan lo kal leh zel tur nghawng thei thil a ni a, sum leh pai leh hmasawnna nen a thleng chi ah an ngai loh thu an sawi.

MPCC chuan, "He Act an pass dawn khan opposition MLA te Act, rules leh guidelines copy te pek tlai an ni a, hemi chungchang hi nimin khan Mizoram Legislative Assembly Speaker khan a rawn sawifiah a, download tur a awm thu a sawi a. FCA Act download tur chu a awm ngei a, mahse rules leh guidelines erawh chu a awm lo a ni. Rules leh Guidelines an hmuh hnu a kan Chief Minister-in kan tan a hlauhawm lo tura Assembly House-a a sawi te kha mipui ah sawifiah ngei rawh se," an ti.

Congress chuan FCAA duh lohna hi kum 2023 khan Assembly ah hian passed a lo ni tawh a, chumi chu sawrkar hmasa khan an bawhzuina lamah a fel tawklo a awm a, an bawhzui tawk lo anih pawn tun sawrkar hian a bawhzui thei a ni. Sawrkar hmasa hunlai a duhlohna an pass tawh revoke lova adopt-na an pass hnan leh te hian he sawrkar kalphung mumal loh zia a tarlang a ni, an ti. Kum hnih kalta a dodal nasa em em tu, sawrkar hmalakna duh khawp lo em em tu ten hetia an pass leh mai hi a mumal loh thlakin a ngaihtuahna hman loh thlak an ti bawk.

FCAA pass chhan hi opposition te duhdan ni lovin ZPM kaihhruai sawrkar duh dan a ni tih hi Mizoram mipuiin an chiang a, chuvangin midang hmer tel talh tum lova, midang mawhpuh kual tur zawng lovin Assembly House ah Majority an neih anga Special Session koh a, a sut lehna resolution siam thuai turin an ngen bawk a ni.