ZALEN August 5, 2025 : ZPM Thalai General Headquarter's Aizawl te chu Sairang - Kawnpui kawng chhe lai siamin vawiin khan an hnatlang a, Sairang, Khamrang leh Mualkhang-a tlawmngai pawlte hnatlang in an chhuak bawk. Congress Thalai (MPYCC) chuan kawng siama ZPM ZPM Thalaite an thawkchhuak hi sawrkar mawnghlimnaah an ngai tih thuchhuah an siamah an tarlang.

Congress Thalai chuan ZPM Thalai Headquarters chu an sawrkar inthlahdahna vang leh nuamtawlna lam an tuipui luat avanga Mizoram chaklakna kawngpui ber, lirthei zawh hleih theih loha hun rei tak a awm hnua hnatlang an nei chu ZPM sawrkar mawnghlimna ah an ngaih thu an thuchhuah-ah hian an tarlang. 

MPYCC thuchhuah chuan, ZPM Legislature Party hian rawtna zahthlak tak, ZPM sawrkara PWD Minister an rin tawk lohna 'No Confidence Motion Move' in, kawng siam mek viltu tur Minister leh MLA detailment an lo siam tawh a. Hetiang hi thil zahthlak a nih hriain Mizoram enkawl kawngah tih theih an neih loh zia leh an hlawhchham a ni tih pawm mai turin thurawn an lo pe tawh a ni, a ti. 

ZPM Thalai chuan Kawnpui to Sairang hi NHIDCL kuta hlan ni tawh mah se, a chhe lai siam kawngah MPWD chuan hma a la zui zel a, PWD Minister Vanlalhlana leh MPWD E-in-C H. Zoramliana te'n riah chilh meuhvin an vil bawk a ni, an ti.

Helai kawng chhia-in Mizoram mipuite tana harsatna a siam nasat zia hria-a MPWD leh Tlawmngai pawl hrang hrangin theih tawp chhuah a kawng an siam laia him chin atang a lo thlir ringawt nih chu ZPM Thalai chuan thil ni thei-ah an ngai lo, an ti a, theih ang tawk ti ve turin an President, South Tuipui AC Bialtu MLA Jeje Lalpekhlua hovin ZPM Thalai member te hnatlangin an thawk chhuak ta a ni, an ti bawk. 

ZPM Thalai chuan Sairang - Kawnpui inkarah motor tluk theihna tur khawp a khuar chhia a awm tawh lo niin an hmu a, an harsatna tawh mek ti zia awm tur a MPWD leh Tlawmngai pawlte thahnem ngaihnaah lawmthu an sawi bawk a ni.