ZALEN, May 24, 2025: Mizoram dealer KC TVS chuan Indian company TVS two-wheeler-in belchian a dawl tih sawiin, Inrinni hian Electric Veng, Police Canteen bul Hnahthialah branch an hawng.

Pastor T Lalawia’n Pathian hnena hlanin TVS Hnahthial Branch hawn a ni a, an hmunpui, Aizawla showroom manager Lalhmangaihsanga leh network manager Michael Lalchhandama’n telpuiin, a lawm nan Hnahthial District Inter-Branch YMA Basketball Tournament an sponsor dawn a ni.

November, 2022 khan Bawngkawn Aizawlah KC TVC showroom hawn a ni a, lirthei ke hnih nei 9,000 vel hralh tawhin district hrang pasarihah sub dealer an nei tawh a, kum hnih leh thla ruk a tlin hmain sub dealer pangngai chiah ni lo mah se an hawn belh leh a, Hnahthial bik hi branch anga kalpuiin an hmunpui, Aizawl atangin an enkawl zui rih dawn a ni.

KC TVS chief executive officer Kevin Vanlaltlana chuan anmahni duhsaktu Mizo mipui zarah hma an sawn zel avangin lawmthu a sawi a, “Indian company a nih angin TVS-in hamthatna a nei a, an lirthei siamte thiamna leh thatna lamah a sang a, chutih lain a man a tlawm a, a tlovin spare part pawh a tawm bik a, mipui nawlpui banphak leh zual a ni,” a ti.

Mi tam tak hian ram dang thil an ngaihsan avangin India siam chu tha lo tura ngaihna an nei thin a, chutiang rilru pute tan TVS bel chiang turin a sawm a, Indian motorcycle company lian ber pawl a nih angin Asia ram 80 chuangah an lirthei hralh chhuah tawh a ni a, BMW Motorrad nen thawk dunin Europe-ah pawh an lut tan chho mek a ni.

Kevin-a chuan, “Lirthei lam tuimite chuan TVS hi ‘Engineering company’ an ti deuh bik kher thin a, an thil siam hi an duh tuiin Indian company-ah chuan technology thar, India mite hlui hmasatu an ni zel a ni,” a ti.