ZALEN September 14, 2025: Kum 2022 atanga kumin 2025 chhungin Inner Line Permit (ILP) nei loa Mizoram lut mi 2,620 thawn kir an ni a, hemi hun chhung vek hian ILP pek chhuah 35,922 a awm.

Home department chhinchhiah danin kum 2022-ah ILP nei loa Mizoram thawn kir mi 377 an awm a, 2023-ah 483, 2024-ah 1,463 leh kumin chhungin mi 297 thawn kir an awm.

Kum 2022 chhungin ILP pek chhuah 12,471 a awm a, 2023 chhungin 8,200, 2024 chhungin 9,759 leh kumin 2025 chhungin 5,492 pek chhuah a awm leh tawh bawk.

Hetihlai hian Home Minister K Sapdanga chuan August 30 khan Kolasib district-a Mizoram leh Assam inrina bul vel a tlawh a, Mizoramah rel a rawn luh dawn avangin ILP pekah fimkhur zawka hmalak a tul thu a sawi.

Bairabi khawtlang hruaitute chuan ILP check gate hela Tlawng dunga Mizoram lut thinte dan nan ILP check gate a awm a tul thu an lo thlen a. Minister pawhin Mizoramah rel a luh dawn bawk avangin ILP pek chhuah kawngah fimkhur zawka hmalak a tul thu a sawi a ni.

K Sapdanga chuan Bairabi-Sairang rel kawng thar chu hmasawnna ropui tak a nih thu a sawi a, “He hmasawnna hian state dang atangin mikhual tam zawk an luhna kawng a hawng zau dawn a, chu bakah, a let zawnga ruihhlo lo luhna kawng pakhat a ni thei a. Dan hnuai­ah Mizorama lutte felfai taka chhinchhiaha an luh theih nan ILP pek kawngah fimkhur zawka hmalak a tul dawn a ni,” a ti.