ZALEN October 19, 2025: Khawsik natna chi khat, dengue vangin kumin hian Mizoramah a kai mi 398 an awm tawh a, thi an la awm lo thung.

Health department thawktute hnen atanga ZALEN thudawn danin dengue natna vei hi kum 2012 atang khan Mizoramah hmuh tan a ni a, chhinchhiah danin a vei hi an vaiin mi 6,210 hmuh tawh an niin thihpui mi pariat an awm tawh bawk.

Mizorama dengue kai hmuhchhuah tam ber kum chu 2023 kha niin 2,060 hmuhchhuah a ni a, thihpui pahnih an awm a. Kum 2022 khan hri kai mi 1,868 hmuh niin mi panga an thi a, nikum khan hri kai mi 744 hmuh a niin thi 1 an awm bawk. 

Kumina hri kai hmuhchhuah an tlem chhan hi a test na khawl 'Elisa' hmanga hmuhchhuahte chauh hri kaia pawm an nih vang niin an sawi. Health department thawktute chuan, "Damdawi in leh laboratory hrang hrangah rapid test khawl hmangin dengue hri kai mi engemaw zat hmuhchhuah an ni a, mahse cenntral lamin Civil Hospital, Aizawl leh Lunglei-a Elisa test na khawl hmanga positive an finfiahte chauh hri kaia pawm an nih vangin hri kai zat hi a tlahniam ta a ni," an ti.

Hetih lai hian dengue natna vei hmuhchhuah an tam tih sawiin, "Elisa khawl hmanga dengue hri kai kan finfiah hi chu hri kai zat atanga chhutin 10% emaw vel chauh an ni a, a dang 90% vel hi damdawi in leh laboratory atanga hmuh an ni a. Mahse rapid test hi sawrkar laipuiin a pawm ve loh avangin dengue hri kai tam zawk hi chu hri kaiah kan pawm ve thei lo a ni," tiin Integrated Disease Surveillance Programme thawktute chuan ZALEN an hrilh.

Dengue hri kai an tam ang hua thi an tlem chhan chu mipuiah awareness a that vang nia an hriat thu sawiin IDSP thawktute chuan, "Sawrkarin he natna umbo tur hian theihtawp a chhuah bakah mipuite pawh natna an veiin an in entir zung zung a, a lo nasat hmain damdawi an ei that chuan a dam leh mai a. Dengue thihpui hi thalai zingah chuan an tam lo a, mahse naupang, kum upa leh natna benvawn nei tan chuan a hlauhawm thei hle a ni," an ti a. September atanga November thla inkar hi dengue natna hluar hun a ni tih an sawi bawk.

Dengue natna laka mipuite an him nan in leh a vel tihfai, tui tlin theihna tih bo, tuizem chhinphui leh thosi pian theihna hmun awm lo siam te chu thil pawimawh a ni tih Health department thawktute chuan an sawi a. "Dengue natna thlentu hi thosi tial rik rek a ni a, heng thosi te hian chhun lamah min seh thin a. Chuvangin thawmhnaw hak uluk, thosi hlauh chhit leh damdawi inchulh bakah chhuna mut pawhin thosilen zar that a pawimawh hle a ni," an ti bawk.

Tun hnaiah Aizawl khawpui chhung a veng hrang hrangah dengue natna a hluar hle a, State Vector Borne Disease Control Programme, Health Department, veng hrang hranga local council te leh AMC Corporator te tangho in dengue do beihpui hi an thlak mek a. Advocacy meeting, thosi pianna tihbo hnatlang leh fogging te neih mek a ni a. Veng 5 Armed veng South, Armed veng, Saron veng, Chhinga veng, College veng ah te thosi tihrem beihpui hi neih tawh a niin Ningani khan fogging hi Zarkawt leh Tuithiang vengah te neih leh a ni. Ruahman dan chuan Ramhlun North leh ITI vengah te neih leh tum a ni bawk.