Kuminah scrub typhus kai 12470 hmu tawh || Rul sa a that leh that loh finfiah a la ni lo

ZALEN August 24, 2025: Mizoten rannung seh an tih mai, scrub typhus vei kum tinin an pung zel a, kuminah he hri kai hi mi 12,470 hmuhchhuah an ni tawh a. Hetih lai hian he natna tihdam nan rul sa a that leh that loh chu finfiahna a la awm loh vangin a that leh that loh hriat a la ni lo.

ZALEN-in health department thawktute hnen atanga thu a dawn danin rannung seh natna hi kum 2014 vel atang khan hriat lar tan niin kum tin hri kai hi an pung zel a. Kumin January atanga August 18, 2025 thleng khan Mizoramah a kai mi 12,470 hmuh tawh niin la pung chho zel tura ngaih a ni.

Rannung seh-ah rul sa a that leh that loh zawhna chhangin health department thawktute chuan, “Zirchianna a la awm loh avangin a that leh that loh sawi ngam a la ni lo a. Rul sa hian protein eng emaw zat a pai a, hei hian a tiharhin damlo pawhin an thatpui ve thei a, chutih rualin scientific proof erawh a la awm lo a ni,” an ti bawk.

Scrub typhus hi hri kai hi kuminah pawh an pun an rinthu sawiin health department thawktute chuan, “Khaw nawm hun lai, November leh December hi ram kal tam hun lai a ni a, heng hun lai hi a kai tam hun a nih avangin kum dang aiin hri kai hi kan pun ngei a rinawm,” an ti.

Scrub typhus chu sazuin an thehdarh nasa tiin, “Kum 2007-08 Mautam vanga sazu puang atang khan a hluar tan a. Kuminah pawh rawthing a tam nasa leh a, khaw tam takah sazu a puang nasa hle a. Sazu hi hri pu darhtu leh thehdarhtu ber an nih avangin pung nasa turah kan ngai a ni,” an ti.

Sazu sa ei avangin hri chu thehdarh a ni lo tih sawi bawkin, “Sazu man leh khawih atangin hri hi kai theih a ni a. Hei bakah hian kan ui vulh atangin hri hi thehdarh theih a ni tih College of Veterinary Sciences, Selesih chuan an finfiah tawh a ni,” an ti bawk.

Scrub typhus chu enkawl hma a nih chuan tihdam a awlsam nia sawiin enkawl tlai a nih thin vangin thihpui an awm niin an sawi bawk a. “Khawsik, lu na, taksa na, ruh chuktuah na leh thil ei tui lo kan neih chuan in-test ngei ngei a tha a. Doctor kan rawn vat chuan enkawl dam theih mai a ni a, tlai erawh chuan thihna hial a thlen thei a. A hun taka doctor pan chuan enkawlna an dawng tha a, an thihpui lem lo a ni,” an ti.

Scrub typhus chu Aizawl, Serchhip, Lawngtlai, Lunglei leh Mamit district-ah a tam zual nia sawiin hei hi test a tam vang nia an hriat thu ZALEN an hrilh bawk.

Kum 2024 atanga Mizorama scrub typhus hri kai awm zat

Kum Hri kai

2014 183

2015 150

2016 90

2017 146

2018 2183

2019 5859

2020 2744

2021 2323

2022 5806

2023 12497