ZALEN August 4, 2025 : Inrinni khan Kolasib Sub Hqrs YMA hnuaia Kumpuan Volunteer te chuan beihpui thlakin Builum leh a chhehvel an dap a, rakzu leh zu bilhlai thahnem tak an tihchhiat bakah mi pakhat chu home-ah an dah bawk.

Kumpuan Volunteer te hian Old Builum-ah zu bilh lai thahnem tak an tichhia a, zu bilhna atana hman plastic barel 1, bel 3 leh bucket 4 pawh tichhiain zu neitu nia sawite hi an awm loh avangin Kumpuan hruaitute hnenah in report turin an fate hnenah hrilh an ni. New Builum lamah pawh rakzu 40 lits vel an man a, zu neitupa hi ama intiamna angin TNT ah dah niin New Builum VC leh VDP hruaitute nen Kalvary Home-ah an dahnghal a ni.

Old Builum-ah hian chenna in 15 leh Biak In 1 a awm a, New Builum VDP hruaitute chuan a cheng mekte chu dan lova awm an nih thu leh Builum khuaa mi chengte chu Serlui tuikhuah a nih dawn vanga sawrkarin a sawnchhuah, zangnadawmna leh inhmun a pek tawhte an nih thu sawiin an in benbel ngheh hma in chhuahtir leh vek se an duhthu an sawi.