ZALEN August 26, 2025: MIFCO a lakhuihthei hralh chungchangah Sialhawk Lakhuihthei chingtuten lawmthu an sawi.

= Mizorama lakhuihthei thar tam ber Sialhawk khua-a lakhuihthei chingtute chuan tun lai hian lakhuihthei an seng mek a. Lakhuihthei hralhna ah harsatna an tawh avanga August ni 13, 2025 (Thawhleh) aṭanga Chhingchhipa MIFCO hmuna lakhuihthei an hralh ṭhin chu a hralhna ah harsatna an neih tawh loh avangin an titawp tawh.

= Lakhuihthei hralhna chungchangah harsatna an tawh avangin Sialhawk Pineapple Growers Society chuan MIFCO Chairman Pu Lalṭhazuala Royte hnenah an harsatna te thlenin, Chhingchhipa MIFCO hmuna sawngbawl turin Sialhawk lakhuihthei leisak turin an ngen a. MIFCO Chairman-in hma a laksakna zarah hian August ni 13, 2025 (Thawhleh) aṭangin MIFCO ah hian an chhung lut a, MIFCO in Sialhawk lakhuihthei an leisak zawng zawng hi quintal 170 leh kg 88 a ni. 

= Lakhuihthei hralhna chungchanga an harsat zual chhunga MIFCO in an laksak avangin MIFCO Chairman Pu Lalṭhazuala Fanai leh a thawhpuite chungah Sialhawk Pineapple Grower Society chuan lawmthu an sawi a ni.

= Lakhuihthei hi a thar tirh lamah khan Gwahaty a North East Aeromatic Company hnenah a rah hring ₹10/kg -in pek a ni a. Vawi khat an rawn kal a, kawng chhia-in a tihbuai tak avangin hralh chhunzawm theih a ni ta lo. 

= Mizoram chhungah Aizawl leh khawpui dangah te Sialhawk lakhuihthei hi an hralh ṭhin a ni a. August ni 26, 2025 thleng hian quintal 7500 vel an hralh tawh a ni.

= Sialhawkah hian lakhuihthei chingtu chhungkaw 250 vel an awm a. Mizoram pum lakhuihthei thar chhuah aṭanga 64% hi Sialhawk khaw thar chhuah a ni.

= Lakhuihthei man hi MIFCO hian nimin khan min pe fel a, lakhuihthei hralhtute hnenah sem fel nghal vek a ni.

#ZalenNews