ZALEN Feb 17, 2026: Mizoram Legislative Assembly 9-na, thutkhawm vawi 6-na leh Budget Session ni bawk chu vawiin khan Legislative Assembly House, Aizawlah tan a ni a. He hun hi Larsap General (Dr) Vijay Kumar Singh, PVSM, AVSM, YSM (Retd) chuan telpuiin thu a sawi. Budget Session hian February 19, 2026 atanga March ni 17, 2026 thleng a awh ang.

Budget Session hawnna inkhawma thu a sawiah, Larsap General (Dr) Vijay Kumar Singh chuan Mizoram chuan remna leh muanna a chhawmnung zel tih sawiin, sum leh pai dehchhuah kawngah pawh hma sawnin hmasawnna rahbi a zawh mek zel a ni, a ti a. Langtlang leh mawhphurhna la ngam din turin Sawrkarin theihtawp a chhuah tih a sawi a. Agriculture leh a kaihhnawih, hmasawnna ruhrel din leh thil siamna industry hlawk tur din kawngah Sawrkarin hma a la zel tih a sawi a. Kutthemthiamna, entrepreneurship leh infiammna hmanga thalaite thuam chak leh intodelha siam chu Sawrkar ngaihpawimawh zinga mi a nih thu a sawi bawk. Mizoram Legislative Assembly rorelna kalphung zahawm tak vawnhim kawnga sulhnu duhawm tak neih tawh thin chu chhawmnung zel turin member-te a sawm a. Larsap chuan he hunah hian Sawrkar hmalakna, hmachhawp leh ngaihpawimawh hrang hrangte a tarlang a ni.

Larsap tarlan dan chuan Sawrkar flagship programme Bana Kaih chuan Phase-II thleng tawhin, CM Special Package atana bithliah chin pawh mipuite tana awlsam zawk nan Rs 50,000/- ah tih hniam a ni a. September ni 13, 2025-a Prime Minister-in a hawn tak Bairabi-Sairang inkar rel kawng thar chuan Aizawl chu India ram railway map-ah a chuantir a, hmasawnna hrang hrang a rawn thlen a ni. Mizoram chu India rama ziak leh chhiar thiam kim vekna state hmasa ber atan May ni 20, 2025 khan puan a ni.

Dan leh thupek kenkawh kawngah harsatna lian tham a thleng lova, ruihhlo cheng vaibelchhe 1,047 chuang hu man a ni a. Mizoram Liquor (Prohibition) Act, 2019 siam thatna leh dan thar hnuaiah nikum December thla thleng khan thubuai 4,915 ziah luh niin, mi 4,532 man an ni a. April- December 2025 chhungin Lok Adalat hnuaia thubuai lut 9,223 zinga 1,769 te chinfel niin, cheng vaibelchhe 47.86 hu inkhinna chinfel a ni a. Mizoram Lok Ayukta hnuaiah Inquiry Wing din a ni tawh bawk.

Mipui Aw kaltlanga vuivaina 197 dawn zinga 161 te chinfel niin, 36 te buaipui mek a ni a. Lengpui Airport terminal cheithat hna 99.20% zawhfel tawh niin, PHE Department hnuaiah Division thar 2 leh Sub-Division thar 5 siam a ni a. NABARD sum cheng vaibelchhe 74.92 senga siam 10 MW Thenzawl Solar Plant chu December 20, 2025 khan hawn a ni a. 24 MW Tuirini Small Hydel Project siam hna pawh kalpui mek niin, a hun taka electric bill pek avangin cheng vaibelchhe 4.28 laia hniam sak (rebate) kan ni. Geological Survey of India leh DM&R Department-in June ni 27, 2025 khan 'Experimental Regional Landslide Early Warning System' kalpui turin thawhdunna an ziak a. Tlawng lui hmun pawimawh laiah tui lian tur hrilh lawkna 'Early Flood Warning System' bun hna thawh mek a ni bawk.

Mizoram chuan Ayushman Card 100% tuam chhuakin, hei hian chhungkaw nuai 2.22 leh mi nuai 5.91 te a huam a. Ruihhlo ngaite enkawlna 'Huhliap Short Stay Centre' ah batch 6 lutin mi 1,488 te enkawl an ni tawh a, Jordan Centre chu Mizoram Synod kutah hlan a ni. Kum 2025-26 chhingin Anganwadi Centre 1,500 te Saksham AWC-ah hlankai an ni a. Mizoram chu sum peipunna tha a siam turin 'Industrial Investment Policy of Mizoram, 2025 siam niin, sawrkar kum kal mek 2025-26 chhungin PMJVK hnuaiah project thar 10, cheng vaibelchhe 186.83 hu pawm a ni.

Digital lama hmalak that avangin ICT Department chuan 'DigiLocker Accelerator Award' a dawng a, Mizoram chuan hmarchhak state-a telecom huangah hma la tha berin tele-density 112.10 a nei a. Aizawl leh District Headquarter-ahte eirawngbawlna gas kawtkaia sem a ni a. April-December, 2025 chhungin Mizoram tlawhtu khualzin 6,79,607 an awm a, heng zinga 9,606 hi ram dang mi niin, Mizoram chu hmarchhak state-a khualhip chak ber a ni. Zokhua, Falkawn-a Mizo khawtlang nun ataka entirna 'Live Museum' neih thin chu mipuite'n an hlut em avangin March 2026 thlenga pawhsei a ni.

Empowering Mizoram Sports hmalakna hnuaiah olympics tinzawnin infiamna huang 8 te thlurbing a ni a. Mizoram chuan January ni 15, 2026 khan "Best Upcoming State Promoting Sports and Physical Education" lawmman dawngin, "India Skills Northeast Regional Competition 2025-26" ah pawh Mizoram chu a ti tha ber bawk. Kum 3 chhunga mi 360 te Artificial Intelligence lama tuaihriam turin IndiaAI nena thawk dunin Data & Artificial Intelligence Laboratory siam mek a ni a. Mizoram chu hmarchhak state-a Property card sem chhuak hmasa ber niin, Aizawl District-ah 4,041 pek chhuah tawh a ni a, Saitual, Kolasib leh Khawzawl District chhunga khua 71 te tan property card 10,401 siam mek a ni bawk.

Sawrkar kum kal mekah job card neite tan chawh rualin ni za inhlawhna 57.59 siam tawh niin, "Project Rotling- Hmasawnna Rahbi Thar" hnuaiah zokhaw hmasawnna project 15 kalpui mek a ni. Pradhan Mantri Awaas Yojana - Gramin hnuaia in sak tura ruahman 29,967 zinga 25,303 zawhfel niin, Panchayat Bhavan thar 30 sak mek a ni. Pala Wetland leh Tam Dil Wetland enkawl nan National Plan for Conservation of Aquatic Ecosystems atangin cheng nuai 113.13 hmuh a ni a. CM Rubber Mission hnuaiah rubber chinna hectate 1,000 a zau siam belh a ni a, December ni 8, 2025 khan Rengdil-ah Kuhva Kût buatsaih a ni bawk.

District tina khaw pakhat talah 'Digital Crop Survey' kalpui tura tih chu tha taka bawhzui anih avangin Mizoram chuan cheng vaibelchhe 60 a dawng dawn a. Kum 2025-26 chhung hian oil palm chingtute'n 5599 MT tharin, cheng nuai 792.45 an la lut a. Bana Kaih kaltlangin Mausenah 'Banana Fibre Extraction Unit' siam mek a ni a. Augmentation of Muga Culture Project hnuaia hamthatna dawngtu mi 565 te training pek an ni tawh bawk a. Thenzawlah nikhata artui 70,000 thar chhuah theihna tur Mega Egg Production Farm siam mek niin, 2025-26 chhungin sangha dil hectare 33.58 a zau leh sangha no khawina hectare 50.043 a zau siam a ni bawk.

RCS Mizoram portal chu February ni 3, 2026 khan hawn niin, RCS Office computerization bikah Mizoram chu India rama state ti tha berte zingah a tel pha a. MULCO tuai thar leh turin January ni 22, 2026 khan Cooperation Department, MULCO leh NDDB-te chuan thawhhona thuthlung an ziak a ni. Autonomous District Council (ADC) hnuaia inrelbawlna zirchiang tura din Study Group chuan October ni 10, 2025 khan Larsap hnenah zirchianna report an thehlut tawh a ni.