ZALEN October 21, 2025: Hnahthial leh Lunglei inkar (NH O2), Zobawk 'S' khawchhung kawngpui chu a chhiat leh viau tawh avangin lirthei chi hrang hrang tan kal a harsa hle tawh a, lirthe tangkhang a tam tawh avangin vawiin pawh khan Baptist Higher Secondary School (BHSS) Bus chu a tlan tlang theih loh avangin naupang engemaw zat an chawlh phah. 

Thu dawn danin lirthei tan kal hleih theih lova kawng a chhiat hi thla 2 chuang a ni tawh a, contractor NHIDCL ten an kawng siam hi a tlo lo hle a, Englai pawhin motor lian a tang a, Company JCB in a nawr chhuah a ngai a, Zobawk khaw chhungah motor lian ding an tam thin a. Vawiinah pawh motor lian a tan avangin BHSS Bus pawhin Zobawk a thleng thei lova, sikul naupang engemawzah an chawlh phah a, KM 1 dawn te lirthei hi an tangkhang a ni. Khualzin phur, Sumo leh LMV engemawzat pawh in kal harsa an ti tawh a ni. 

Thudawnna chuan Zobawk a lirthei neite pawhin Lunglei an kal dawnin an lirthei an keng phal lo. Mamawhna avangin Lunglei kal a tul fo si a, Taxi leh Auto fare ah Rs 800/1000 dawn te sen a ngai thin a, senso a hautak hle a ni an ti. Hetiang anih avang hian sorkar programme leh pawimawh dangah Phone hmang a hnathawh theih anih chuan mihring in ko kal kher lova thil tih dan awm se an duh tih an sawi. 

Zobawk hi Lunglei Municipal huam chhung a awm a ni a, LMC leh bialtu MLA te pawhin ngaipawimaw se an duh thu Zobawk lam chuan an sawi tih thutlakna chuan a tarlang bawk.