ZALEN July 21, 2025 : RB McCabe Hall, Aijal Club-ah Chief Minister Lalduhoma chuan vawiin khan Mizo Diaspora Cell leh LushAITech ten tangkawpa an siam khawvel hmun hrang hranga cheng Mizote inthlunkhawmna tur internet portal thar Mizo DiasporaHub a hawng. He hunah hian Diaspora Cell Chairman Valaldina Fanai chuan China leh Cambodia a tangkhang te an buaipui mek tih a sawi.

Chief Minister chuan, "Kalphung thar, mipui sawrkar kan intiam ang tak khan, kan sawrkar hnuah kalphung thar kan siam hnem tawh a, chung zingah chuan tunlai thiamna hmanga mipui leh sawrkar indawrtawnna lam a tam hle," a ti.

Diaspora Cell Chairman Vanlaldina Fanai chuan Diaspora Cell chu kum 2024 June ni 11-a din tan a ni a. A tir lamah kha chuan ram pawna harsatna tawk te chhanchhuah chu an hna hmasa a ni a ti.

Vanlaldina Fanai chuan tunah pawh China rama zirlai tangkhang mek leh Cambodia lama harsatna tawk mekte tana an hmalak mekna tlangpui sawiin Ministry of External Affairs te nena tangruala an bawhzui mek thu a sawi a. Hman ni lawka Mizoram tlawha lo zin Surinder Bhagat, Protector General of India bulah khan engkim lo thlen a ni, a ti.

Diaspora Cell Chairman chuan Dan ang taka ram danga an kal hi chuan harsatna an tawh pawhin hmalak a nuamin a awlsam thin a. Nimahsela, dan bawhchhiaa an kal a, man an va tawh te, harsatna an tawh chang te hian hmalak a har em em thin, a ti a. Dan ang thlap zela ram pawna chhuak vak thin tur leh an awmna ram dante zawm thin turin a chah bawk.