ZALEN October 6, 2025: September 13, 2025-a prime minister-in a hawn, Sairang thlenga rel service chu Mizo mipuiten an hmang tangkai nghal hle a, bungraw chawk luh nan tangkai taka hman nghal a nih bakah zin veivakten an chhawr nghal hle.

ZALEN thudawn danin PM-in a hawn atangin Sairang thlenga rel lut hi bungraw hrang hrang chawk luh nan hman tangkai nghal a ni a, rel a bungraw phurh man hi a man a tlawm a, a rang a, a awlsam bawk avangin mipuiah awlsamna a thlen chho mek niin thudawn a ni.

Hetihlai hian ZALEN-in a biak railway thawktu lam chuan tun aia a nasa zawkin Mizo mipuiten bungraw chawk luh nan hmang se an duh tih an sawi a, chumi tur atan chuan ruahmanna pawh an siam chhoh zel thu an sawi.

ZALEN-in rel hmanga khualzin thenkhat a biakte pawhin Sairang thlenga rel a lut ta chu lawmawm an tih thu an sawi a, Mizoram sawrkarin Aizawl atanga Sairang rel station panna tur MST a service-tir bawk avangin man tlawm takin rel hmangin a zin veivah theih niin an sawi.

“Rel hmangin, him taka state pawn a zin theih ta hi a lawmawm hle a, hun a duh rei lo a, a him bawk a, tunah chuan Mizoramin bung thar a kai ta niin ka hria,” tiin khualzin pakhat chuan a sawi.

Tar lan tawh angin September 13, 2025 khan Prime Minister Narendra Modi chuan lehlangin Mizoram a tlawh a, Rs. Vbc. 8,071 senga siam Bairabi - Sairang rel kawng thar, km 51.38-a thui hi a hawng a, Mizorama rel service thar pathum: Aizawl - Delhi Rajdhani Express (Anand Vihar Terminal), Aizawl - Kolkata Express leh Aizawl - Guwahati Express te a vailiam nghal bawk.

PM hian November 29, 2014 khan he rel kawng sakna tur lungphum hi a lo phum tawh a ni.

Bairabi - Sairang rel kawng hi a thui zawng chu km 51.38 niin, Bairabi - Hortoki inkar chu km 16.72 a ni a, Hortoki - Kawnpui, km 9.71 niin, Kawnpui - Mualkhang, km 12.11 a ni a, Mualkhang - Sairang, km 12.84 a ni. Station 4 (Hortoki, Kawnpui, Mualkhang leh Sairang) awmin, leiverh 45 a awm a, leiverh sei zawng (total) chu km 12.853 niin, lei (major bridge) 55 awmin, minor bridge 88 a awm.

Lei sang ber, kurung lui chu metre 114-a sang niin, hei hi India rama rel lei sang ber dawttu a tling pha.