ZALEN August 23, 2026: Mizoram University-a Department of Zoology-a head ni mek, Prof. H.T. Lalremsanga leh a research scholar, Virender K. Bhardwaj leh Zeeshan A Mirza te chuan Jammu & Kasmir, Western Himalayas atangin khawmual kaikuang (scorpion) chi hrang DNA leh pianphung an zirchianna atangin species thar hmuchhuakin a hmingah Liocheles gracilispalpus an vuah.

He nungcha hmuhchhuah thar hi Marshall University, West Virginia, USA Scientific journal, Euscorpius chuan August 14, 2026 khan a tlangzarh (published) ta a ni.

He khawmual kaikuang species thar hmuhchhuah chungchangah hian Prof. H.T. Lalremsanga chuan, “Liocheles scorpion bikte hi khawvel pumah species nga awmin India-ah hian species thum chhinchhiah (record) tawh an ni a. He species thar hmuhchhuah tak hi Indian scorpion diversity atan mel lung pawimawh tak a ni dawn a. Khawmual kaikuangte hi nungcha pawimawh tak niin, rannung te reuh tete (pest) control-tu atan te, nungcha chaw inkhaidiat (foodchain leh foodweb)-ah te leh an tûr (venom) hi damdawi chak tak tak siam nan a tangkai hle a. Hengte avang hian kan ram chhunga nungcha awmte zirchian hi a la pawimawh dawn chauh a ni,” a ti.