ZALEN August 6, 2025: Mizoram Public Service Commission (MPSC) chuan Mizoram Civil Services (Combined Competitive) Preliminary Examinations - 2025 chu ni 08.08.2025 (Zirtawpni) hian Mizoram chhung Exam Centre hrang hrangah a buatsaih dawn. Candidate 4740 an awm a, an zingah hian PwBD – 25 an awm.

Examination hi Aizawl khawpui chhung Institution/ Venue – 6 (paruk) bakah Mizoram District Headquarters zawng zawngah neih a ni ang. Preliminary Examination hi shift hnih (2)- chawhma leh chawhnuah thenin Exam buatsaih tur a ni a, 1st Shift-ah Paper-I (General Studies) niin, chawhma dar 10:00-ah tan a ni ang a, 2nd Shift chu chawhnu dar 2:00 ah tanin, Paper – II (Aptitute Test) exam tir an ni thung ang. Paper – II hi qualifying paper atan chauha hman tur a ni a, he paper-ah hian 33% tal candidate in a hmuh phak a ngai a. Paper-II a 33% hmu phak te zing atangin Paper-I a mark hmu sang apiang ten Preliminary Exam hi an paltlang dawn a ni.

Mizoram Civil Services (Combined Competitive) Preliminary Examinations -2025 atan hian mi 4740 ten application an thehlut a. Aizawl khawpui chhung Centre hrang hrang leh District hrang hrang atanga Candidate awm dan dinhmun chu hetiang hi a ni:-

1. Aizawl        :      3856 candidates (PwBD – 15)

2. Lunglei        :      252 candidates (PwBD – 2)

3. Siaha         :      130 candidates

4. Champhai     :      122 candidates

5. Kolasib       :      120 candidates (PwBD – 2)

6. Serchhip      :      74 candidates (PwBD – 1)

7. Lawngtlai      :      57 candidates (PwBD – 1)

8. Mamit        :      36 candidates (PwBD – 1)

9. Hnahthial      :      35 candidates (PwBD – 1)

10. Saitual       :      32 candidates (PwBD – 1)

11. Khawzawl    :      26 candidates (PwBD – 1)

Total          :     4740 candidates 

Tun tumah hian Unreserved posts 34 a awm a. MPSC Examination inkaihhruaina Dan hmanlai mek ang chuan Main Examination thu thei tura Preliminary Examination paltlang tur mi 340 an awm dawn tihna a ni. Mizoram Sawrkarin Main Exam-a optional subject tihbo nana Mizoram Civil Services (Combined Competitive Examination) Rules, 2025 a siam thar avang leh, he Notification chhuah hnuah chauh inbuatsaihna kalpui theih a nih bawk avangin kum dang zawng aiin Preliminary Examination buatsaih hun hi a tlai hret a ni.