ZALEN August 10, 2025: MNF party chuan ropui taka Mizoram Independence puan kum 60-na lawmna hman an tum.

MNF chuan March 1, 1966 khan Mizoram Independence a puang a, nakum hi independence puan kum 60-na champha a ni a, a lawm dan tur hi MNF Sr. Vice President Dr. R.Lalthangliana kaihhruaina hnuaiah Celebration Committee din a ni.

Celebration Committee hi Zirtawpni khan thukhawmin Zofate tana zalenna puan champha lawmna chu Mizo nationalism puan zar nan leh hnam rilru Zofaten thuk zawka an putna tur lam hawi zela hman nise, an ti.

Mawhphurhna hrang hrang chanvo insiamin sub-committee pasarih din a ni a. Independence puan kum 60-na lawmna hi Zoram pum huapa hman tum niin MNF sub-headquarters leh block hrang hranga bawhzui turin ruahmanna pawh duan chhoh zel tur a ni.