ZALEN July 27, 2025 : Kum 2019-a din, eiruk thubuai chhuitu tur, Mizoram Lokayukta chuan kumin thlengin thubuai chhuitu tur, ‘Investigation Wing’ a la nei lo a, hetihlai hian thubuai chhui tur 78 a dawng tawh. 

Mizoram Lokayukta tar lan danin, March, 2019-a din a nih atanga kumin thlengin an hnuaiah thubuai 78 ziah luh a ni tawh a, chung zinga 55 chu chhui zui tlaka ngaih a ni.

Case hearing tum 45 neih tawh a ni a, thiam loh chantir pali leh thiam chantir pakhat an awm tawh a. Department proceeding tura tih thubuai pathum a awm tawh bawk.

Mizoram Lokayukta hotute hnen atanga ZALEN thudawn danin tun thlengin Mizoram Lokayukta hian thubuai chhuitu tur, Investigation Wing a la nei lo a, Enquiry Wing erawh a nei tawh.

Investigation Wing a la neih loh avang hian thubuai chhui tur an dawnte chu Anti Corruption Bureau (ACB)-ah an pek zel a ngai thin.

Investigation Wing nei tur hian Mizoram Lokayukta Rules tihdanglam a ngai dawn tih thudawnna chuan sawi bawkin, hei hi sawrkar khawih tur a nih thu a sawi.

Mizoram Lokayukta-a eiruk thubuai thehluh hi lehkha pheka ziakin Mizoram Lokayukta office-ah pisa kai chhungin thehluh theih reng a ni a, heimi bakah hian email hmangin mizoramlokayukta@gmail.com emaw mizoram.lokayukta@gov.in-ah complaint thehluh theih reng a ni.

Tun hnaiah hming awm lo leh thubuai thehluttute biak pawh theih loh complaint a awm thin a, thu zawh belh ngai leh complaint kal zel dan tur hriattir turin complaint kalpui chhunzawm zel a harsa thin.

Complaint-ah hian thubuai thehluttuin a hming leh biakpawh theihna chiang takin a ziak thin tur a ni a. Thubuai thehluttuin a hming leh nihna thup a duh a nih pawhin a hming leh nihna thupsak tlat tur a ni.