Mizoram Poor Federation-in Mizoram sawrkar leh Synod chungah lawmthu sawi

ZALEN September 29, 2025: Mizoram Poor Federation chuan vawiin khan Aizawl Press Club-ah Press Conference an ko a, he hunah hian ZPM sawrkar hmalakna, MUHCS leh Hand holding hnuaia CM’s Special Package siam a ni chu lawmawm an tih thu an sawi a, Synod Hospital in MUHCS a zawm tur chu lawmawh an ti bawk.
Poor Federation chuan MUHCS chungchang sawiin, "Ministry hmasaah khan Health Care-ah kan inziaklut ve bawk a, dam loh nikhuaa Hospital-ah Admit kan nih phei chuan pawisa sen hmasak a ngai a, pawisa puk chawp tein kan inenkawl a, dam chhuak lova Hospital kan chhuahsan changte phei chuan, Lusun leh leibat nen, kan phur a rit thin hle a ni.,
"Tin, mi mawl te te leh chinchang hre lo ten kan senso Bill kan buaipui angai a, sawrkarin kan Bill lah chu rei tak tak min lo batsak a, Mi retheite kan chepin khatih laia sawrkarah khan beisei a bo hle a nih kha! ZPM Ministry-in Mizoram Universal Health Care Scheme (MUHCS) a duang a, heta inziaklut chhungkuate chu a thlawn veka enkawl kan nih bakah, thi emaw, dam emawa Hospital kan chhuahsan pawhin Bill buaipui a ngai ve tawh lova, Mi rethei leh mi mawlte tan hlei hlei a thawventhlak takzet a ni," an ti.
Synod hotute leh Synod Hospital hnena Lawmthu sawiin, "Chhan hrang hrang avangin Hospital tam zawkin MUHCS an zawm lova, Mi retheite dinhmun hrethiam a MUHCS zawm ve hram turin keini pawhin kan ngen thu pawh kan puang tawh a ni. Hetih lai hian mi tam takin kan pan Synod Hospital a thuneitute leh sawrkar inbiakna chuan rah tha tak chhuahin Synod Hospital chuan MUHCS a zawm tur thu kan hriat hian, Synod hotute leh Synod Hospital hnenah kan thinlung chhungril ber atangin he Press Conference kaltlang hian Lawmthu kan sawi a ni," an ti.
Hand holding hnuaia CM’s Special Package chungchang pawh sawiin, "Sawrkar kal tawhte hi huat vang ni kher lovin sawilan tulna a awm ve thin. A chhan chu: Rs. 3,00,000/- khan mi rilruah hmun a chang thuk hle a, term khat chhungin a hmu tamin Rs.50,000/- te an hmu a, a thenin Rs.25,000/- an hmu hman hram a nih kha."
"Term khat chu sawi loh, term chanve an la hman zawh hmain ZPM Ministry-ah chuan Hand holding Policy hnuaia Chief Minister’s Special Package pawh Trade mil zelin bul tanna tur Rs.1,00,000/- hmu pawh an awm bakah party thliar lova hma an lakna hi an fakawm a, kan Member atanga diltu zingah a tam zawkin an hmu a, kan lawm hle. Tin, ZPM hian an Campaign hlaah party dang angin Mi retheite hi Political Ball-ah an hmang ve vak lo nachungin an rorel dan hian Mi rethei hnen a thlen phak tlat avangin ZPM Ministry chungah Lawmthu kan sawi a ni," an ti bawk.