ZALEN Aizawl 9, 2025 : Hmar Students' Association (HSA), General Headquarters hruaitute chuan vawiin khan Chief Minister Lalduhoma chu a office-ah an hmu a, thil pawimawh chi hrang hrang an sawiho a, December 3-5 chhunga Saipum-a General assembly leh Sikpui Ruoi an hman turah Chief Minister hi khuallian-ah an sawm.

Lalduhoma chuan, inkalpawhna tih hmasawna'n leh Zofate impukhatna tura hmalakna kal zelah Mizoram sawrkarin Aizawl leh Tuithaphai (Churachandpur), Manipur inkarah helicopter service tir an tum thu leh Churachandpur-ah Mizoram house sak thuai an tum thute HSA hruaitute hi a lo hrilh a ni.

Mizoram sawrkarin Mizoram leh Tipaimuk (Manipur) inkalpawhna pawimawh NH-2 (Formerly 54) a Tuivai bailey bridge (Unity Bridge) a dawh sak chungchangah HSA hruaitute chuan lawmthu an sawi a, Mizoram Hmar lam inkalpawhna kawng a bik takin Serkhan - Bhaga road a Saipum - North Hlimen inkar leh Tuirial - Mauchar inkar kawng siamthat te, khaw thenkhatah tui supply tha zawk a awm theina'n leh development chak zâwka kal theihna'n a hma laksak tûrin Chief Minister hi an ngen a ni.

HSA hruaitute hian nimin khan Assembly Speaker Lalbiakzama, Minister of State Lalnghinglova Hmar leh MLA & Ex-Minister Robert Romawia Royte te hmuin General Assembly leh Sikpui Ruoi hmanpui turin an sawm bakah thil pawimawh chi hrang hrang an sawipui bawk a ni.

Chief Minister hmuhnaah hian HSA hruaitute hi HSA Assembly Speaker L Rothanglien Khawbung in a hova, Adviser to the Chief Minister (Political) Lalmuanpuia Punte, MLA leh Mizoram a HSA hruaitu thenkhatin an tawiawm a ni.