ZALEN October 19, 2025: Mizoramah kum 1990 atanga kumin 2025 thlengin HIV vei mi 32,544 hmuh chhuah an ni tawh.

Mizorama HIV inkai chhawn tamna ber chu mipat hmeichhiatna hman atangin a ni a, HIV vei hmuh chhuah zawng zawng atangin zaa 63.93 a ni a. Inchiuna hmanrua (needle/syringe) inhman tawm atanga kai zaa 30.80 an awm.

Mizoramah a thlawna HIV vei leh vei loh enna hmun, Integrated Counselling & Testing Centre (ICTC) 39 a awm a, HIV veite enkawlna ART centre 14 a awm a. District tinah ICTC leh ART Centre a awm a. HIV Estimation 2023-in a tar lan danin Mizoram Adult HIV Prevalence chu zaa 2.73 a ni a, National Adult HIV Prevalence chu zaa 0.2 a ni.

Kum 1990 atanga kum kal ta 2024-25 thleng khan Mizoramah HIV vei mi 32,544 hmuh chhuah an ni tawh a, HIV vei mi 5,632 an thi tawh.

HIV vei hmuh chhuah zingah kum 25-34 inkar an tam ber a, zaa 41.49 an tling a. Kum 35-49 inkarin dawtin zaa 27.99 an tling a, kum 14-24 inkar zaa 21.56 niin kum 50 chung lam zaa 6.24 an tling a, kum 14 hnuai lam za a 2.72 an tling bawk.

MSACS thawktute chuan, “Tun hma chuan HIV natna hi mi awm tha duh lo leh ruihhlo ngaite chauh kai theih tura kan ngaih laiin tunah chuan kan rin loh pui puiten an kai tawh a, kan fimkhur tlan a pawimawh tak zet,” a ti.