ZALEN September 29, 2025: Vawiin hian Mizo Hnam Runah chhung inkhawm neih a ni a, Dy. CM hlui Tawnluia leh MNF National Core Committee member chuan thu a sawi a, "Pathian leh mipui zarah kan sawrkar leh a nih chuan kan sawrkar leh veleh FCAA 2023 sawrkar-in a adopt hi kan hnuklet nghal ang," a ti.

Tawnluia chuan, "FCAA hi Mizoram tan a ṭha lo a, kan pawm thei lo. He dan hi MNF sorkar khan Assembly-ah Resolution pass-in Mizorama hman a remti lo a, a hnael tawh a. Lok Sabha Secretary General hnenah pawh August ni 28, 2023 khan hriattir nghal a ni a. Chuvangin, he dan hi Mizoramah hman a ni lo," a ti a. "ZPM sawrkar-in he dan Mizorama hman tura an pawm (adopt) ta hi a pawi tak zet a. Remna thuthlung zahlohna leh palzutna a ni a, kan pawm thei lo a, kan do zel dawn," a ti bawk.

Tawnluia chuan, "ZPM sawrkar-in ram an hralh a, sawrkar laipuiin an duhdan ang anga Mizoram hmang thei turin phalna (blanket permission) a pe hi rem kan ti thei lo," a ti a. "Kawng hrang hrangin tunhnaiah nationalism-in beih a tawk mek a. Kan ram, kan hnam leh sakhua venghim zel turin hnam pasalṭha leh martar-te hniakhnung i zui ang u. Mizo mipuite kan tanrual a ngai lehzual ta hle a ni," a ti.

Deputy Chief Minister hlui chuan, "CSS employee-te dah ngheh tur chungchangah Chief Minister-in sorkar hmasa ruahmanna a khirh, tiin a sawi a, harsatna awm chhanah a puh a. CSS dah ngheh hi MNF sorkar khan a ngai pawimawh hle a. Study team insiamin department 16-a CSS-te chungchang zirchian a ni a. January 2023 khan Study Group-te report pawh Cabinet-in a lo pawm tawh nghe nghe a. Drafting committee siam a ni a, CSS Regularisation Scheme an siam ta a, Cabinet-a put luh a nih hmain inthlan puan a ni ta a ni," a ti a. 

"ZPM an lo sawrkar khan a ngai ngaiin an rawn pawm a, a kum chiah an thlak a ni. Tuna CSS-te an nawrhna chhan tak hi ZPM sawrkar thiltih liau liau a ni. October ni 21 2024 khan Office Memorandum an siam thar a, hei memorandum hi CSS employee-te nawrh chhan tak a ni. MNF sawrkar thil tih pakhat mah a awm lo a, ZPM sawrkar thiltih liau liau a ni," a ti bawk.

Mizo National Army, Army Chief hlui chuan, "Tuna kan CM Pu Lalduhoma hian Dampa bial inthlan chungchang a sawinaah 'MNF kahhlum' tih tawngkamte a hmang thar leh a. Thing leh raw innawhlaiin thil thleng tam tak a awm. Remna leh muanna a lo awm a, phuba inlak tawnna te awmzui lovin, mitin inrem takin kan awm tlang a. Remna vawng nung tur ber CM meuhin remna tichhe thei tawngkam a rawn hmang hi a pawi hle," a ti a. Pu Lalduhoma'n rel pui kan ngai lo, MLA 27 kan nei a, ro kan rel mai ang, tia a sawi chu pawi a tih thu Tawna chuan a sawi a. "Democracy ramah chuan mipuiin kan duh kan sawi ve a thiang. Kan CM hi a lal tawh em em a ni," a ti bawk.