MNF-in total bandh siam an tum hi thil nuihzathlak tak a ni - Chief Minister

ZALEN October 20, 2025: Chief Minister Lalduhoma chuan Dampa Bial By Election neih tur atan East Block campaign chu vawiin khan Community Hall, Reiek-ah a Kick-off a, Chief Minister hian FCAA 2023 an pawm avanga MNF-in total bandh siam an tum chu thil nuihzathlak tak a ni, a ti.
Lalduhoma chuan, "Dampa bial hi MNF leh Congress-ten kum tam tak an lo in enkawl chhawk tawh bial a ni a, Mamit district pawh dawm kan ngai, India rama district hnufual ber zinga mi a ni mek hi kan vei a, kan sorkar chuan dawmkan tumin theihtawp a chhuah mek a ni.
"Handholding policy atangin Hmunphiah leh thil dang dang dah thatna tur warehouse 8 kan siam a, zau hrang hrang pawh tur link road kan lai a, department hrang hrangah hmasawnna tur sum tam tak kan dahin ruahmanna kalpui mek a ni bawk. Rubber Mission pawh thuang thumin kalpui a ni a, khaw hrang hrangah hmalak niin a cheibawlna tur nen cheng nuai 3394 zet hmalakna kalpui mek a ni. Khaw 14-ah tui connection pek a ni tawh a, tui harsatna khuaah tui zem pek zel tura ruahman fel tawh a ni."
"Tin, Dampa bialah tui harsatna sukiang turin cheng vaibelchhe 700 chuang ruahman fel a ni a, a putilin hunah chuan mipuiten hnianghnar takin tui an hmang thei tawh ang. Tin, he bialah hian Mizorama la awm ngai lo Incubation Centre dah a ni dawn a, thalaite pual tur he hmun atan hian Rs.35 crore chu a thawh khat nan pawisa kan dah a ni," tiin department hrang hranga Dampa bial khua tana hmalakna zawh tawh leh kal mek te a sawi bawk.
Lalduhoma chuan,"Congress sawrkarin Forest Rights Act (FRA) an lo pawm tawh leh kalpui tawh chu kum 2019 khan MNF ministry chuan an paih a, he act pawimawh tak mai hi kan sorkar hnuah nikum khan kan tinung leh ta a ni. He act hnuaiah hian mipuite leh kan ram a him dawn a, chutiang chiah chuan FCAA pawh ram neitu leh ram a him zawkna tur a ni. MNF party hian kan ram felna tur ni lo kan buaina tur an buaipui char char a, total bandh te hial siam an tum hi thil nuihzatthlak tak a ni," a ti bawk.
Vanlalsailova, Dampa bial by election neih tura ZPM official candidate pawhin thu sawiin, "Block leh Unit hrang hranga kan tanrualna leh campaign thawmah kan khingpuite an zam tawh a, a bikin minority area lamah nasa takin hma kan sawn a, anmahni zawkin thahnem an ngai a, a tlem berah vote 1200 chuang hmuh kan inbeisei. Mizoramah sawrkarna chelhtu kan nih avangin tumahin opposition MLA neih an duh ka ring lo. Hun lo taka min kalsantu Pu Lalrintluanga Sailo pawh khan ruling bial nih kha a duhthusam a ni a, a duhthusam tihhlawhtlin hi ZPM chauhin kan tum lova, bial mipuite pawhin tihhlawhtlin an tum ngei ka ring takzet a, ngaihtuahna fim tak pawh an put ka duh takzet a ni," a ti.
Campaign kick-off ah hian Prof.Lalnilawma leh Lalnghinglova Hmar bakah Baryl Vanneihsangi ten thu an sawi bawk.