ZALEN July 28, 2025 : Mizo Hnam Runah chhung inkhawm chu vawiin khan neih leh a ni a. Hun hnihna a thusawitu MNF Senior Vice President Dr. R. Lalthangliana chuan Lalrintluanga Sailo, MLA chanchin sawiin, MNF NCC ni lai, MNF term kal ta a Dy. Goverment Chief Whip, a boral ni thlenga MNF Legislature party Deputy Leader a ni a. Naupangte a nih lai atanga Mizoram zalenna sualtute zingami, a boral ni thlenga Mizo Nationalism nunpuitu leh midangte tana thil phal em em-in a awm loh san ta chu MNF tan channa nasa tak niin, MNF chuan ui takzet a ni a ti.

Dr. R. Lalthangliana chuan Mizoram GST dinhmun a sawi a. "Hei hi keima sawi mai ni lovin hman ni lawka Union Finance Minister pawhin a sawi a ni. GST hniam reng reng chu Finance Commission atangin sum an dawng tha thei ngai lo. Kan hun lai khan GST lakluh a pung nasa a, tuna GST tlahniam ta em em hi restricted tender leh departmental-a contract hna inpek a nasat vang pawh a ni thei," a ti.

"Kum 2017-18, GST dan hmanga chhiah lak anih tanga a vawi khat nan kum 2024-25 ah Mizoram GST lakkhawm a tlahniam duai a, Covid hunlai pawha la thleng ngai lo a ni. Kum tharah pawh ziaawm lam aiin a hniam zawngin kan kal chhunzawm zel. ZPM sawrkar hi Finance enkawlah a hlawhchham chiang hle. Sum puk hi sum fai pawhin a tam a, GSDP percent atanga chhut pawhin Mizoram leiba san ber kum a ni," a ti bawk.

MNF Senior Vice President chuan, "India ram-a State leh UT zingah sum ruahmanna Crores 600 zêt thehlut hmasa ber kan ni a. MNF sawrkar term hnih chhung khan tuna World Bank Road : Aizawl - Thenzawl - Lunglei Road hi kan peih hman a. Aizawl Bawngkawn atanga Durtlang kawng motor lian inpelh theihna tura siamtu kan ni. Multi-Modal Transit kawng zau tak siam chhuaktu kan ni bawk." 

"Aizawl - Seling - Serchhip - Hnahthial - Lunglei - Lawngtlai leh a piah lam thlengin Double Lane kan neih mêkte hi MNF siam a ni bawk. Aizawl - Saitual - Khawzawl to Champhai tuna double lane hi MNF sawrkar kutchhuak a ni. Aizawl to Mamit, Kawrthah to Zâwlnuam, Kanhmun lam pawh MNF sawrkar hmalakna a ni. Aizawl to Sesawng - Darlawn - Sakawrdai - E Phaileng - to Suangpuilawnte pawh MNF hmalakna vek a ni," a ti. 

"Mizorama sawrkar building tha leh ropui zawng zawng hi MNF kutchhuak deuh vek niin, development lian tham zawng zawng hi MNF kutchhuak deuh vek a ni a ti. Good Governance chuan sawrkar hmasa thil tih that chu a chhunzawm mai tur a ni tiin, MNF chu a tak taka hnathawktu kan ni a, thil tha chu sawrkar hmasa hmalakna pawh kan chhunzawm zel a ni," a ti bawk.