ZALEN August 20, 2025; Zofa Welfare Organisation (ZWO) hruaitute chuan Mizoramin State Human Rights Commission a neih ve theihna turin High Court-ah PIL thehluh a nih tawh thu leh tun dinhmunah cabinet pawmpuina nghah a nih tawh thu an sawi.

ZWO hruaituten vawiin khan Aizawl press club-ah thuthar thehdarhtute kawmin, an legal adviser, Rosalynn L Hmar chuan, September ni 2, 2021 ah ZWO bultumin PIL thehluh a nih thu sawiin, hemi chungchang ngaihtuah hian vawi 46 din a nih tawh thu leh order tum 46 chhuah tawh a nih thu a sawi.

Rosalynn L Hmar sawi danin, hemi chungchang 4.6.2025 a court in a ngaihtuah danah chuan, State Human Rights Commission (SHRC) Rules home department in a draft chu Law & Judicial lamah enfiah (vetting) tura thawn a ni a, 26.5.2025 ah chhui chian (vetted) a nih bakah, chhuah (pubish) a hmabak tawh mai tur thu sawrkar ukil in a report a, 14.7.2025-ah chuan MSHRC Rules chu Law & Judicial department kuta a la awm thu leh siamthat ngai a awm neuh neuh thu a report.

Court-in a ngaihtuah hnuhnun ber 30.7.2025 ah chuan MSHRC Rules chu Law & Judicial department in a enfiah tawh thu leh cabinet in a an pawmpui (approval) an nghah thu sawrkar ukil lamin report an thehlut bawk a ni.

#ZalenNews