ZALEN August 1, 2025: Hrangturzo Bialtu MLA Lalmuanpuia Punte, Adviser to CM ni bawk chuan a bial chhung khaw pathuma X-Ray khawl chhia thlakna tur, MLA (LAD) Fund atanga a lei mipui hman theiha install zawh a nih avang leh hlawhtling taka X Ray pawh neih a nih avangin lawmthu a sawi.

Muanpuia hian a MLA Fund hmangin Biate CHC, E. Lungdar PHC leh N. Vanlaiphai CHC te X-Ray khawl thar a leisak a. A X-Ray khawl thar leite hi Biate - July ni 23, E. Lungdar - July ni 24 leh N. Vanlaiphai - July ni 25 khan install niin, X-Ray pawh hlawhtling taka neih nghal a ni.

Thil tih ngai hrang hrang harsa tak tak a awm avangin install mai theih lohin a awm reng a, Health Minister Lalrinpuii te, Health Commissioner H. Lalengmawia IAS bakah Health Department lama thawktuten hma an lakna avangin tunah hian install zawh tawh niin, mipui hman theiha peih fel a ni ta a ni.

Muanpuia chuan hun rei tak harsatna hrang hrang avanga install hleih theih loha awm tawh, tuna mipui hman theiha a awm ta hi lawmawm a tih thu a sawi a. Health Department lamin ngai pawimawha harsatna tam tak paltlanga X-Ray khawl bun fel a nih theih nana thawktu zawng zawngte chungah lawmthu a sawi bawk.