ZALEN October 6, 2025: Mizorama Myanmar raltlan zinga mi 11,693 chu biometric enrolment hmanga chhinchhiah an ni tawh a, tuna chhinchhiahte hi raltlan zawng zawng atanga chhutin 37.40% an ni tawh.

Home department chhinchhiah danin Mizoramah Myanmar raltlan mi 31,265 an awm mek a, heng zinga 3,319 hi mipa niin hmeichhia 3,584 bakah naupang (kum 18 hnuai lam) 4,790 an awm bawk.

Raltlan chhinchhiah hna hi July, 2025 tawp khan tan a ni a, an awm tlemna district-ah hna hi chak taka kalpui a nih laiin an awm tamna, Champhai, Siaha leh Lawngtlai district-ah kalpui chak a harsa tih department thawktuten an sawi. 

“Raltlan chhinchhiahna khawl hman mek hian a duh fir a, chak zawka hnathawh a nih theih nan khawl kan hman mek, ‘Thales’ hi lei belh kan tum a. Heng khawlte hi raltlan awm tamna district-ah pek belh kan tum,” tiin home department thawktute chuan ZALEN an hrilh.

Raltlan chhinchhiah hna hi Mamit district-ah July 28, 2025 khan tan a ni a, July thla chhungin district tinah bultan vek a ni. 

Raltlan zingah biometric hmanga chhinchhiah duh lo leh hlau an awm a hlauhawm loh tih sawiin, “Chhinchhiah hi anmahni raltlan tan a tha zawkin a him zawk a, chhinchhiah an nih loh chuan dan lova rawn lut (illegal migrant) anga chhiar an ni dawn a. Dan lova lut anga chhiar an nih chuan thawn let an ngai dawn a; chuvangin, raltlan awmte hian hlau lova chhinchhiah hna hi tha taka thlawp turin kan ngen a ni,” tiin department thawktute chuan an sawi bawk. 

Raltlan chhinchhiah hnathawh kawngah harsatna hrang hrang an tawk tih sawi bawkin, “Kan duh angin internet connection kan nei tha lo a, hei hian hnathawhna kawngah harsatna min siam a. Hei bakah raltlante hi a then haw, a then lo kalte an nih avangin a changin an tam a, a changin an tlem bawk a. An zat chiah pawh tihdik a har khawp mai,” tiin Zalen an hrilh a. Raltlante hi a then relief camp-ah chhinchhiah an ni a, a then chu camp pawn, an chenna hmunah kala chhinchhiah an ni.

Thudawn danin sawrkar laipui chuan Myanmar raltlante chhinchhiah tur hian Mizoram sawrkar chu tum eng emaw zat a hriattir tawh a; mahse Mizoram hian chhuanlam siamin a hnar thin a. Sawrkar laipuiin chhinchiahna tura a ruahman, embassy form chu raltlante tan a him lo thei nia sawiin chhinchhiahna dang hmang turin sawrkar laipui chu a ngen. 

Embassy form-ah hian Myanmar sawrkarin raltlante hming leh nihna a hriat theih vek dawn avangin raltlante tan hian a him lo niin an sawi a. Mizoram sawrkar ngenna hi pawmin sawrkar laipui chuan Foreigners Identification Portal (FIP) hmanga chhinchhiah turin ruahmanna a rawn siam leh.

Raltlan ZAT leh chhinchhiah tawh Zat

District   Raltlan   FIP    Chhinchhiah%

Aizawl   4303   3545   82.83 

Lunglei   15   788   52.33

Siaha   5083   1025   20.17

Champhai   13527   2715   20.17

Kolasib   166   119   71.69

Serchhip   647   592   91.50

Mamit   308   261   84.74

Lawngtlai   6017   1659   27.57

Hnahthial   701   540   77.03

Khawzawl   310   292   94.19

Saitual   188   157   83.51

Total   31,265   11,693   37.40