ZALEN August 4, 2025 : ZPM chuan Party Office-ah chhung inkhawm vawiin khan an hmang a, thusawitu Lt. Col. Clement Lalhmingthanga, MLA chuan, “Eptu Party-ten ram tana thil tha kan tih an hlau emaw tih turin sawisel tur ringawt leh mipui bum theih tur an zawng mek. Kawng chhe chungchangah nasa takin min bei a; mahse, hei hian tanrualna leh thahnemngaihna min neihtir a, kan tan malsawmna a ni,” a ti.

Champhai South bialtu chuan, “Kalphung thar mipui sawrkarin thil tha tam tak a tih zingah kan thalaite tana hna thawh tur tha tak mai, Territorial Army chu Chief Minister hma laknain Mizoramah din a ni dawn a, hei hi sawrkar laipui leh State sawrkar tang kawpin an din tur a ni a. Branch hrang hrangah departmental leh non-departmental a awm ang. Kum 2024 atang khan Chief Minister Pu Lalduhoma hma laknain Mizoramah din tura hma lak a lo ni tawh a, Operation Sindoor avanga din chawp tur a ni lo," a ti.

Clement Lalhmingthanga chuan, “Kan sawrkar hma lakna chak tak hi a hmu duh chuan an hmu mai a, chutih laiin eptu party-te chuan he ram tana thil tha kan tih an hlau emaw tih turin sawisel tur ringawt leh mipui bum theih tur an zawng mek a ni. Kawng chhe chungchangah nasa takin min bei a; mahse, hei hian tan rualna leh thahnemngaihna min neihtir a; kan Minister leh MLA rualten a hmunah an vil vut vut reng a; chu vangin, eptuten min beihna hi kan tan malsawmna a ni,” a ti bawk.