ZALEN August 25, 2025 : Vawiin khan ZPM party chhung inkhawma thusawitu Lalmuanpuia Punte, Adviser to Chief Minister chuan, "Tlawmngai pawl (NGO) inthlanah ZPM Party kan inrawlh ve ngai lo," a ti.

Lalmuanpuia Punte, chuan, “Kalphung thar mipui sorkar kan din meknaah ZPM chuan tlawmngai pawl (NGO) hrang hrangte a tha zawnga an hmalakna thlawpa kan thawhpui laiin, an inthlannaah erawh kan inrawlh ngai lo va, ZPM sorkar hnua NGO inthlanna awm tawh, MHIP, MSU leh MJA inthlanaah Party leh sorkar a inrawlh lo. Kan hmaa MZP inthlan awm turah pawh inrawlhna kan nei lo va, sorkar leh party-in sum pawh kan pe lo. Pawl hruaitu tha tak thlang chhuak turin duhsakna kan hlan a, tute pawh tling se tha taka thawhpui kan tum a, anni pawhin tha taka min thawhpui kan beisei,” a ti.