ZALEN July 28, 2025; Ni za inhlawhna chungchangah central sawrkar atangin kalphung tih danglam a awm a, dan bawhchhe luite lakah na taka action la turin state tinte hriattir an ni.

Vawiin chawhnu dar 1 khan a office-ah thuthar thehdarhtute kawmin, Rural Developement (RD) minister Prof. Lalnilawma chuan he thu hi sawiin, Ni za inhlawhna-ah ministry chuan MGNREGA hnuaia inhlawhna hi a tak taka kalpui a, hna kan thawk tak tak a ni tih lantir theihna tur mobile apps NMMS atangin hnathawh tan tirh leh ban dawnah attendance a capture vek turin state tin te thurawn a pe niin a sawi.

RD minister chuan, "Hnathawh ṭan tirhah mihring 20 kan lan chuan, hnathawh ṭan tirh a mihring te vek kha ban dawnah NMMS hian capture leh a ngai a. Mihring ngai vek an lan loh chuan reject tur niin, hnathawk lo angah kan awm dawn a, hlawh pawh kan nei thei dawn lo," a ti bawk.

He ruahmanna thar hi pal zam mai lo in, thahnemngai taka dik tak leh fel fai takin ni 100 inhlawhna kalpui a ngai tak zet tawh tih minister chuan sawiin, "Ministry of Rural Development hian NMMS hi ngai pawimawhin, he mobile Apps atanga attendance te hi ram pum huap a kalpui tur niin, khawi state mah hi ngaihna thiamna kan pe dawn lo a, dik lo taka hnathawk leh attendance capture thin te lakah pawh Zero Tolerance Policy kan apply a tiin leh hre reng chunga ti sualtu chungah na taka action la turin state zawng zawng min rawn ti a ni," RD minister chuan a ti bawk.

#ZalenNews