ZALEN September 4, 2025: Ministry of Education, Govt. of India chuan vawiin khan India rama University leh College tha a thlanna, ‘National Institutional Ranking Framework’ (NIRF) ranking a tihchhuahah, Pachhunga University College chu College category-ah 49-na a ni a, Mizoram University chu University category-ah 82-na a ni thung.

NIRF result hi vawiin khan Bharat Mandapam, New Delhi-ah Union Minister for Education, Shri Dharmendra Pradhan chuan a puang a. Minister of State for Education, Jayant Chaudhary pawh a tel bawk. He inkhawmah hian India rama University leh College tha thlan chhuah aiawh mi thahnem tak an tel a, Pachhunga University College aiawhin Principal, Prof. H. Lalthanzara leh Mizoram University aiawhin Registrar, Prof. Lalnundanga te an tel bawk a ni.

NIRF hi sawrkar laipui, Ministry of Education-in India rama zirna in sang (higher educational institution) te inelna tur atana tehfung mumal tak hmanga a buatsaih a ni a. Kum 2015 atanga bul tan a ni a, kumin hi a kum 10 na a ni.

Pachhunga University College hi kum 2020 atang khan a tel ve tan a. Kum 2022 khan India ram college tha 45-na a ni a, 2023-ah 34-na niin 2024-ah 35-na a ni a, 2025 hian 49-naah a awm leh a ni. India ram college 50000 chuang zingah kumin hian college 4030 an tel a, PUC hi 49 naah a lang a, PUC tih loh chu India hmarchhak college zingah ranking 100 hnuai lama lang pha an awm lo a ni.

Kum 2025-ah hian college category-ah pakhatna chu Hindu College an ni a, pahnihna chu Miranda House niin pathumna chu Hans Raj College an ni.

Ranking tehna 2023-2024 angin PUC-ah hian UG-ah zirlai 2761 an awm a, heng zingah hian state dang zirlai 45 leh India ram pawn (international students) 12 an awm. PG lamah zirlai 88 an awm bawk. PUC-ah hian Arts, Science, Commerece leh Management stream-ah department 23 an awm mek bawk a ni.

Participating colleges from NE in College category: 

Assam-149 

Manipur-30 

Tripura-19 

Nagaland-11 

Meghalaya-9 

Arunachal Pradesh-4 

Mizoram-2 

Total= 220

Rank:

Pachhunga University College – 49th

B. Barooah College, Guwahati, Kamrup Metro: 201-300 Rank-band

Govt. Zirtiri Residential Science College: 201-300 Rank-band

Nowgong College, Nagaon Assam: : 201-300 Rank-band