ZALEN July 28, 2025 : Mizoram Oil Tanker Driver Association (MOTDA) te kawng chhiat avanga hun engmaw chen an nawrh hnuah Zirtawpni atang khan Mizoram-ah Oil an phurh lut leh tan a, zanin tlai thleng khan Oil phur lirthei 150 chuang an rawn lut leh tawh.

Mizoram Oil Tanker Driver Association (MOTDA) hruaitute atanga ZALEN thudawn danin Vairengte-a Oil phurte in-report na thinah IOCL tanker 129 ten Vairengte an paltlang tawh a, BPCL & HPCL tanker 21 chu Vairente-ah hian an in-report tawh bawk a, rawn thlen belh tur pawh an awm an ti. 

Mizoram Oil Tanker Driver Association (MOTDA) hruaitute kawngchhia avangin an member Oil la tur kal te chu kawng lakah an la tangkhang nasa an ti a, kawng dinhmun enin kal lam leh haw lamah harsatna tawh an la hlauhthawn thu ZALEN an hrilh.

Mizoram Oil Tanker Driver Association (MOTDA) chuan Kawnpui - Sairang kawng chhia chu Oil tanker tan tlan a him lova an ngaih avangin July 19, 2025 atang khan an chawl a, July 25, 2025, Zirtawpni tlai atang khan Kolasib DC ngenna angin an tlan tan leh a ni.

Kolasib DC Robert Lalhmangaiha chuan July 25, 2025,, Zirtawpni khan MOTDA Hqrs hruaitute chu Vairengte-a an office ah kawmin, Mizoram-a tuialhthei a harsat thu a hrilh a, an nawrhna titawp turin a ngen a, Mizoram a tuialhthei phurtu Tanklorry te chu load la tur leh load la a ding te chu mipuite harsatna hria a, an nawrh bansan turin a ngen, a ngen ang hian July 25, 2025 tlai atang khan an tlan tan leh a ni.