ZALEN July 31, 2025: Chief Minister Lalduhoma chuan a office-ah AK Chaudhary, General Manager, NF Railway (Construction) leh a thawhpuite a kawm a, Sairang Rel station hawn hun tur leh Mizoram chhim lama rel kawng kal zel tur chungchang a sawi a, Thenzawl hnaih-a rail station dah tul a tih thu CM hian a sawi.

Sairang rel station hawng tur hian Chief Minister hian Prime Minister Narendra Modi a sawm a. Prime Minister hi a rawn kal theih dawn chuan inbuatsaih a ngai a. A hawnna function neihna hmun tur te, Hortoki leh Mualkhang station a tlawhna atana Helicopter tumna tur lo siam lawk te, rel kawng a endikna atana special coach lo buatsaih te a tul tur thu an sawi a. A rang lama inbuatsaih turin Chief Minister hian General Manager hi chahin, an hmalakna enhona August ni 19-a neih leh ni se, an ti.

Union Railways Minister-in a lo tiam tawh ang a, Sairang rel station chu World Class-a siam chhoh zui dan tur leh Rajdhani Express a rang lama tlantir nghal dan turte pawh an sawi dun.

Chaudhary Chuan, "Tunah hian rel kawng leh Station te hi chu hawn theiha peih a ni tawh a. Amaherawh chu Sairang-ah hian Secondary Maintenance Facility Centre for Coaches chu kan sa leh mek a. Hei hian thla khat leh a chanve vel a awh dawn avangin kan sak zawh hun hi central lam chuan an rawn ngaichang leh mai thei," tiin an hmalakna kal mek te Chief Minister hi a hrilh.

Chief Minister hian, Thenzawl chu Peace City atana siam tum a nih thu leh Master Plan siam hna an tan mai tawh tur thu sawiin, chhim lama rel kawng kal zel tur hian Thenzawl Peace City hi a daifem, hla vak lovah paltlang thei se, station hi hla lutuk lo se a duh thu a hrilh a. An preliminary survey ah chu chu lo ngaipawimawh turin a chah. Chaudhary hian, Thenzawl kianga kaltir an tum dan report chu kumin October thla vela hriattir hman a tum tur thu Chief Minister hi a hrilh a ni.