ZALEN July 20, 2025: Aizawl chawmtu tura ruahman pakhat, Greater Aizawl Water Supply Scheme (GAWSS) Phase III atanga PHE-in tui an pump theih loh vangin Aizawl khawpuiah hnianghnarin tui sem theih a la ni lo a, he harsatna hi chin fel thuai tum a ni.

ZALEN-in Public Health Engineering (PHE) thawktute hnen atanga thu a dawn danin GAWSS Phase I & II atang chuan harsatna lian awm lovin tui hi pump theih ni mah se, hemi pahnih ringawt hi chuan Aizawl mipui mamawh a phuhru zo lo tih an sawi. 

Phase I atang hian ni khatah tui 10.8 mld leh phase II atangin ni khatah 24 mld pump theih a ni a; mahse, nileng (24 hrs)-a pump theih a nih loh avang leh mipui hnen a thlen hmaa tui bothlau a tam avangin hnianghnarin tui hi an la sem thei lo niin an sawi.

PHE thawktute chuan 37 mld pump theihna, GAWSS Phase III a that lai chuan tui pump leh sem kawngah harsatna an tawk lo nia sawiin thla khatah vawi thum vel consumer-te hnenah an pek theih thin avangin harsatna a awm lo niin an sawi a. Tun dinhmunah Aizawl khawpuiah tui connection hi 84,000 bawr vel a awm mek.

PHE thawktute chuan GAWSS Phase III atanga tui an pump theih loh chhan chu power pekna ber, Sihhmui sub station khawl a kan vang leh Vaivakawn Zohnuaia pipe lian a chhiat vang niin an sawi a. Sihhmui sub station siam that a nih hma chu harsatna hi a la thleng dawn nia sawiin tui pump-na atan hian hmun dang atangin power hi pe mah se, khaw dangin an tuar thin tih an sawi a. 

Hei mai bakah Vaivakawn Zohnuai-a pipe siam dan tur pawh minister hovin official leh khawtlang hruaitu ten an sawiho tawh a, siam that thuai a nih an beisei tih PHE thawktute chuan an sawi bawk.

Picture : PHE Phase 3 Setlak tui pump na