ZALEN July 20, 2025: Aizawl district huam chhunga Police station hrang hrang ten kumin kum chanve (January-June) chhunga thubuai an ziah luhah in rawk leh rukruk case a tam fal hle a. Kum chanve chhunga thubuai (case) an ziah luh 818 zingah in rawk thubuai 318 leh rukruk thubuai 214 ziah luh a ni.

Thubuai ziah luh atangin inrawk leh rukrukna thubuai hi case zawng zawng atanga chhutin 65.03% a tling a, rukruk thubuai zinga 14% hi lirthei ruk thubuai a ni a. Thubuai ziah luh tawh zinga 107 chu court-in ching fel tawhin heng zinga 89%-ah thil tisualtute thiam loh chantir an ni bawk.

Superintendent of Police, Aizawl thawktute hnen atanga ZALEN thudawn danin thla ruk kalta chhung khan Aizawl district huam chhungah hian in rawk leh rukruk baka thubuai ziah luh tam zualte chu zu khapna dan bawhchhiatna (MLP Act) 53, promulgation 37, POCSO Act 27, intihnat thubuai 20 te an ni a. Sualna lian leh langsar zingah tualthah thubuai pali, tualthah tum case pahnih, pawngsual thubuai pakua, arms act pariat, ND&PS Act pakua te chu a langsar zual an ni a. Thla ruk kalta khan Aizawl district chhungah hian mihring thihna lirthei chetsualna tum 20 a thleng bawk.

January atanga June chhung khan Aizawl district-ah hian thubuai 818 ziah luh a ni a, thubuai ziah luh hi Bharatiya Nyaya Sanhita (BNS) hnuaiah 733 leh Special Law (NDPS Act/Arms Act etc) hnuaiah 91 te an ni a. Thubuai ziah luh kaihhnawihah hian mi 727 man an ni a. Ruihhlo bikah thla ruk chhung khan Aizawl district chhungah police hian heroin gram 236.04 leh ganja kgs 13.27 an man. 

Heng an thil man kaihhnawihah hian case pakua siam niin mi 11 man an ni a. Aizawl district-ah hian Aizawl DEF hnuaiah police station pakua a awm a, chungte chu Aizawl PS, Bawngkawn PS, Kulikawn PS, Vaivakawn PS, All Women PS, Sairang PS, Sialsuk PS, Darlawn PS leh Sakawrdai PS te an ni.

Aizawl khawpui chhunga police station-te chuan CEIR (Central Equipment Identity Register) portal chu mobile phone bo chhuichhuah nan tangkai takin an hmang mek. 

CEIR kaltlangin mobile phone bo 284 chhuichhuah niin a neitute hnenah hlan leh a ni a. Kum 2025 chhung hian ILP endik hna vawi 41 neih tawh niin dan bawhchhia mi 195 chu man an nih hnuah thuneitute hnen a hruai an ni tawh bawk a ni.