ZALEN July 27, 2025 : Aizawl DC Office huaihawt thawnthu insawisiakah Grace Lalrinpari Hauzel, Pachhunga University College chu pakhatna a ni.

Aizawl DC office huaihawtin Zirtawpni khan I&PR Auditorium-ah district huap thawnthu insawisiak, 'District Level Story telling Competition for Aizawl District' buatsaih a ni a. Inelna ah hian mi 16-in Aizawl-a hmun lar leh tlawh hlawh paruk Sailam; Lungleng Lal In; Phulpui; Sakawrhmuituai Tlang; Hangi Lunglen Tlang; Sialsuk te bakah Aizawl District chhunga history nei thate chanchin an insawi ngaihnawmsiak a ni.

He intihsiakna ah hian Grace Lalrinpari Hauzel, Pachhunga University College chu pakhatna niin pahnihna P.C. Lalruatdika, Sialsuk leh pathumna Vasty Lalremruati, Sentea Memorial School, Zemabawk te an ni.