ZALEN July 28, 2025; YMA Sub-Hqrs Hnahthial chuan an huam chhunga raltlante Voter's ID emaw Aadhar Card neih nana hmalakpui an khap.

Young Mizo Association Sub Headquarters Hnahthial chuan an huam chhunga raltlante kaihhruaina dan an siamah, raltlanten Voter’s ID emaw Adhaar card emaw an neih nana hmalakpui an khap bakah chibil inlakhran an remti lo.

YMA Sub Headquarters Hnahthial te hian an thurel bawhzuiin, Myanmar buaina avanga Hnahthial District chhunga himna zawnga raltlante enkawl leh inkaihhruaina dan an siam chu rorel Inkhawm vawi thumna kar kalta inrinnia an neih ah an tlangzarh a, inkaihhruaina chi hrang 18 an siam zingah, raltlante hming leh nihna kimchang chhinchhiahna ID card, kum khat chhung atan zel siamsak te, tul bik thila Hnahthial district an chhuahsan dawn emaw an lut dawn emaw a nih chuan branch YMA hrilh ngei a tul thu te, raltlanten Voter’s ID emaw Adhaar card emaw an neih nan a hma lakpui phal a nih loh thu te, raltlanten a hranga inkhawm emaw hnambil bik pawl emaw an siam an phalsak lo bawk a ni.

Hei bakah hian raltlante zingah sumdawnna dik lo, ruihhlo leh ralthuam hmanga sumdawnna chi reng reng phal a ni lova, tilui an awm a nih chuan, na takin YMA in an chungah hremna a lekkawhin thuneitute kutah hlan zel an ni dawn a, duh duha mikhual neih leh foreign bike leh lirthei dangte an duh duha ramri leh Mizoram chhunga tlantir an phalsak lo bawk.

#ZalenNews