ZALEN July 25, 2025; Ruihhlo tawlh ruk leh lirthei bo ven nan MZP Hnahthial hmalaknain Hnahthial luhka hmun thumah CCTV Camera Rs. 10,46,050 man hu dah a ni dawn.

Mizo Zirlai Pawl Headquarters: Hnahthial chuan nikum 2024 khan Home Minister, K Sapdanga hnenah, 'Ruihhlo tawlh ruk leh lirthei bo ven nana Hnahthial luhka hmun thuma CCTV Camera dah' tura an dil chu, Aien Consultants lamin DPR leh a thil tul dang an buaipui fel hnuah home department leh police headquarters lam atangin pawmpuina a chhuak tawh a ni.

Nimin khan Aien Consultants lamin MZP Hqrs Hnahthial hruaitu te leh Area VC te nen a hmun turte an en fel a, kar thar lam atangin hna thawh tan an inbeisei bawk a ni. Hnahthial luhka hmun thum MZP-in CCTV Camera dahna tura an thlante chu, Hmar lamah Johana Pa Filling Station bul, Chhim lamah Sericulture Office bul leh Chhuah lamah Thingsai Road -ah te niin Aien Consultants lam hian CCTV Camera dahna atan hian Rs. 10,46,050 man hu DPR an siam a ni.

MZP Hqrs Hnahthial chuan an dilna ngaipawimawh saktu Home Minister K Sapdanga chungah thinlung takin lawmthu an sawi nawn leh a ni, tih an thu chhuahah an tarlang.