ZALEN Aug. 13, 2025; Kumin January atanga August ni 8 thleng khan Mizoramah ruihhlo vangin mi 51 an thi tawh a, heroin leh a kaihhnawih vanga thi an tam ber. Ruihhlo vanga thi te hi kum 19 atanga kum 57 inkar an ni.

Excise & Narcotics department-in a chhinchhiah danin, kumin January thla atanga tun thla August ni 8 thleng khan Mizoramah ruihhlo avangin mi 51 an thi tawh a, heng zinga mi 44 chu mipa niin, midang 7 te chu hmeichhia an ni a, ruihhlo vanga thi te hi thalai kum 19 atanga kum 57 inkar an ni.

Excise & Narcotics Department-in Mizorama ruihhlo vanga thi a chhinchhiah tan kum 1984 atanga kumin thlengin Mizoramah ruihhlo vangin mi 1930 an thi tawh a, an zinga mi 1697 te chu mipa niin, 233 te chu hmeichhia an ni a, ruihhlo vanga thi tawh zingah kum 14 mi chu a naupang ber a, kum 58 chu a upa ber thung a ni.

Kum 2004 kha Mizorama ruihhlo vanga thi an tam ber tum niin mi 143, mipa 122 leh hmeichhia 21 an thi a, khatih hunlai khan proxyvon chu an thihpui tam ber a ni a, kum 2015 chho atangin ruihhlo vanga thi zingah heroin vanga thi an tam tan a. Kum 2005 hnulamah kum 2023 kha ruihhlo vanga thi an tam leh ber tum niin, mi 76 in ruihhlo vangin nunna an chan a ni.

#ZalenNews