ZALEN August 2, 2025: Home Minister K. Sapdanga chuan vawiin khan Sairang - Khamrang - Kawnpui inkar kawng (NH-6) siamthat hna kalpui mek chu a hmunah kalin a endik a; Kawnpui leh Khamrang khawtlang hruaitute, MTOA leh Driver Association hruaitute nen inbiakna neih niin hmalak zel dan tur rel ho a ni. Khaw pali YMA ten kawng siam hna hi an thawhpui dawn.

Home Minister hova ruahmanna an siam dan chuan August 4-9 chhungin ngawrh lehzuala kawng siam hna hi thawh tum a ni a, he ni 5 chhung hian PWD leh NHIDCL ten an tha zawng zawng hmangin kawng siam hna an thawk ang. Lirthei tangkhang mekte chu Mizoram Police ruahmanna hnuaiah August ni 3 (Pathianni) ah chhuahtir vek tur niin, ke 14 nei (14-wheeler) chin chunglam erawh chu tlan phal a ni rih lo ang a, an bungraw phurh pawimawh leh hmanhmawhthlak chu truck te zawka transit tur a hrilh an ni. 

Thawhtanni atanga nilaini (4-6 August) inkarah phei chuan lirthei eng chi mah tlan phal a ni dawn lo a, hetih chhung hian 407 chin hnuailam tan tlang kawngah (Kawnpui-Serkhan-Durtlang road) tlan theih a ni ang. Lirthei chet vel dan hi Aizawl leh Kolasib Traffic Police ten an vil dawn a; MLA TBC Lalvenchhunga chuan Single Point of Contact niin kawng siam hna hi a vil zui dawn bawk. 

Kawnpui, Khamrang, Mualkhang leh Sairang YMA ten hnatlangin kawng siam hna hi an thawhpui dawn bawk a. Minister chuan hnatlanga thawk chhuakte chu lawmman pek an nih tur thu a sawi a ni.

Kawng thawmthat hna hi NHIDCL hnuaiah BR Goyal Infrastructure ten thawkin, Mizoram PWD chuan a tul apiangah khawl leh hmanruate nen an tanpui reng bawk a ni.